ԱՄՆ հատուկ բանագնաց Սթիվ Ուիթքոֆը երեքշաբթի օրը հայտարարեց, որ այս շաբաթ Նյու Յորքում նախատեսում է հանդիպում ուկրաինացի ներկայացուցիչների հետ։

«Այս շաբաթ  ուկրաինացիների հետ հանդիպելու եմ Նյու Յորքում, ինչը մեծ ազդանշան է։ Մենք ամեն օր խոսում ենք ռուսական կողմի հետ»,- նշեց Ուիթքոֆը Fox News-ի հետ զրույցում:

Ուիթքոֆը ինքը համոզված է, որ Ռուսաստանի նախագահ Վլադիմիր Պուտինը ցանկանում է վերջ տալ հակամարտությանը։

«Ըստ իս, Պուտինը փորձում է բարեխղճորեն նպաստել երկխոսությանը։ Նույն մոտեցումը նա ցուցաբերեց նաև Ալյասկայի գագաթնաժողովում, բայց դա բավականին բարդ հակամարտություն է»,- հավելեց Ուիթքոֆը։

«Կարծում եմ՝ մենք կարող ենք ականատես լինել երկկողմ հանդիպմանը։ Նախագահը պետք է ներկայ լինի բանակցությունների սեղանին՝ գործարքը ստորագրելու համար»,- հայտարարեց Ուիթքոֆը։

ԱՄՆ նախագահ Դոնալդ Թրամփը օգոստոսին Պուտինի հետ անցկացրել էր գագաթնաժողով Ալյասկայում, իսկ հետագայում Սպիտակ տանը հանդիպել Ուկրաինայի նախագահ Վլադիմիր Զելենսկու և ՆԱՏՕ-ի ու Եվրոպայի ղեկավարների հետ։

Այս հանդիպումներից հետո Թրամփը նշեց, որ Զելենսկին և Պուտինը կանցկացնեն երկկողմ հանդիպում, որից հետո նախատեսվում է եռակողմ հանդիպում Թրամփի մասնակցությամբ։ Զելենսկին կարծիք հայտնեց, որ Ռուսաստանը ջանքեր է գործադրում Պուտինի հետ հանդիպումը կանխելու համար, մինչդեռ Ռուսաստանն ասում է, որ նման հանդիպման համար օրակարգը դեռևս պատրաստ չէ։