Մարդու իրավունքների պաշտպանի գրասենյակը տեղեկություն է ստացել սոցիալական ցանցերի և ԶԼՄ-ների հրապարակումների մշտադիտարկման արդյունքում այն մասին, որ Երևանում և մարզերում կան մի քանի ձերբակալվածներ։ Պաշտպանին ահազանգել են նաև թեժ գծով՝ նշելով, որ ազատությունից զրկված անձանց գտնվելու վայրը հայտնի չէ:

Պաշտպանի հանձնարարությամբ ստացված տվյալներ ուսումնասիրվում են անձանց իրավունքների հնարավոր խախտումները պարզելու նպատակով։ Հետազոտությունների արդյունքներով, ՄԻՊ լիազորությունների շրջանակներում, ձեռնարկվում են քայլեր:

Պաշտպանը հաստատում է, որ ազատությունից զրկելը պետք է համապատասխանի ՀՀ քրեական դատավարության օրենսգրքի դրույթներին և Մարդու իրավունքների եվրոպական դատարանի ու ՀՀ դատարանների դիրքորոշումներին, բացառելով անհիմն ազատությունից զրկում:

ՄԻՊ թեժ գիծը շարունակում է ստանալ ահազանգեր այն մասին, որ որոշ տրանսպորտային միջոցներ դեռևս հունիսի 18-ից գտնվում են Ոստիկանության հատուկ տարածքում: Պաշտպանը բազմիցս անդրադարձել է այս հարցին, այդ թվում՝ տարեկան հաղորդումներում:

Վերոնշյալ դեպքերի առնչությամբ Պաշտպանը պահանջել է պարզաբանումներ իրավասու մարմնից, որոնց վերլուծությունից հետո կներկայացնի իր դիրքորոշումը: Նա ընդգծում է, որ տրանսպորտային միջոցները հատուկ տարածքներ պետք է տեղափոխվեն և արգելանքի տակ դրվեն միայն համապատասխան իրավական հիմքներով՝ այս կարգը խստորեն պահպանելով։