ԱՄՆ հատուկ բանագնաց Սթիվ Ուիթքոֆը CNN հեռուստաալիքին տված հարցազրույցում նշել է, որ Ռուսաստանի նախագահ Վլադիմիր Պուտինի հետ ուրբաթ օրն ունեցած քննարկման արդյունքում եղած զգալի առաջընթացը ստիպել է ԱՄՆ նախագահ Դոնալդ Թրամփին հրաժարվել անհապաղ հրադադարի իր մտադրությունից: Նրա փոխարեն կենտրոնանում են ավելի լայն խաղաղության համաձայնագրի վրա։

«Խաղաղության համաձայնագրի համար անհրաժեշտ մյուս բոլոր կետերում մեծ առաջընթաց գրանցել ենք, և նախագահ Թրամփը կենտրոնացել է հենց այդ ուղղությամբ»,- ասել է Ուիթքոֆը։

Դրա համաձայն, այժմ նկատվում է ավելի լայնածավալ խաղաղության համաձայնագիր կնքելու հնարավորությունը, որը վերացնում է անհապաղ հրադադարի անհրաժեշտությունը։

«Մեր նպատակն է կնքել խաղաղության համաձայնագիր, որը շատ արագ կդադարեցնի ռազմական գործողությունները։ Ավելի արագ, քան հրադադարը։ Մենք քննարկել ենք բոլոր այն թեմաները, որոնք անհրաժեշտ կլիներ քննարկել ու համաձայնեցնել հրադադարի ընթացքում»,- հավելել է ԱՄՆ հատուկ բանագնացը։

Այնուհետև, ըստ նրա, ռուսաստանյան կողմն իր դիրքորոշումների մեղմացման առումով ավելի մեծ քայլեր է արել նախորդ հանդիպումներից։

«Առաջին անգամ տեսնում ենք զիջումների ավելի շատ հնարավորություններ, քան երբևէ նախկինում, և ավելի շատ, քան նախորդ վարչակազմի օրոք։ Սա դրական է։ Այժմ պետք է այս առաջընթացը զարգացնել և գործարք կնքել՝ ուկրաինացիների համար»,- ամփոփել է Ուիթքոֆը։