Քաղաքաշինության կոմիտեի նախագահ Եղիազար Վարդանյանը շնորհավորական ուղերձ է հղել Շինարարի օրվա առթիվ:

«Սիրելի շինարարներ, հարգելի գործընկերներ, Ջերմորեն շնորհավորում եմ մասնագիտական տոնի՝ Շինարարի օրվա առթիվ: Ձեր ամենօրյա պատասխանատու աշխատանքով դուք նպաստում եք մեր երկրում նոր դպրոցի, մանկապարտեզի, ժամանակակից հարմարություններով առողջապահական, մշակութային և մարզական կառույցների ստեղծմանը, ինչպես նաև ճանապարհների, ջրամբարների և այլ ենթակառուցվածքների կառուցմանը:

Յուրաքանչյուրիցդ ձեր չափով մասնակցում եք պետության զարգացմանը։ Այս գիտակցումն ունենալով՝ վստահ եմ, որ կապահովվի շինարարական ծրագրերի բարձր որակը, հուսալիությունը և հարմարավետությունը: Վերջին տարիներին շինարարության ծավալները շարունակաբար աճում են, ինչը վկայում է այս ոլորտի առանցքային դերի ու կառավարության կողմից նրա կարևորման մասին։ Այս աճը արտացոլվում է նաև վճարված հարկերի ձևով։

Այս տարվա առաջին կիսամյակում շինարարության ոլորտից պետական բյուջե վճարված հարկային եկամուտները 2024թ. նույն ժամանակաշրջանի համեմատ աճել են 47%-ով՝ հասնելով 105.6 մլրդ դրամի։ Շնորհակալ եմ հարկերը անխախտ վճարելու պետականամետ գործելաոճի համար։ Կառավարությունը շարունակելու է կապիտալ շինարարության ծավալներն ընդլայնելու հանձնառությունը։

Նախագծվել է նոր շարք դպրոցների և մանկապարտեզների, ինչը խթան պետք է լինի շինարարական ներուժը առավելագույն պատրաստվածության բերելու և ոլորտի չօգտագործված հնարավորությունները իրացնելու համար։

Հուսով եմ՝ վստահելի հետագիծ ու ձեռագիր ունեցող շինարարական կազմակերպությունները հետաքրքրված կլինեն՝ մասնագիտական ներդրումներ ունենալու պետական ծրագրերում, իսկ նրանք կարող են լինել օրինակելի՝ շինարարության ոլորտում միջազգային չափանիշներ ներմուծելով։

Քաղաքաշինության կոմիտեն համախմբում է ջանքերը՝ խթանող միջոցառումներ նախաձեռնել, որպեսզի Հայաստանի շինարարությունը համընթաց քայլի միջազգային միտումներին։ Այս նպատակին հասնելու համար կարևոր է Եվրոպական միության քաղաքաշինական նորմերի մոտարկումն ու տեղայնացումը։ Զուգահեռաբար մշակվում է կազմակերպությունների վարկանիշավորման մեխանիզմ, որը կնպաստի քաղաքաշինության որակի բարձրացմանը և նոր նշաձողի սահմանմանը։ Սիրելի շինարարներ, շնորհավորում եմ ձեր տոնը և մաղթում եմ հաջողված ծրագրեր ու նոր հնարավորություններ»,- ասված է ուղերձում։