Սթենֆորդի համալսարանի ուսանողական թերթը դատական հայց է ներկայացրել ԱՄՆ պետքարտուղար Մարկո Ռուբիոյի և ներքին անվտանգության նախարար Քրիստի Նոեմի դեմ՝ կապված ուսանողների արտաքսման և նրանց վիզաների չեղարկման հետ:

Հեռուստաալիքի հաղորդմամբ, ԱՄՆ առնվազն 22 նահանգներում՝ առանց բացատրության, օտարերկրյա ուսանողները զրկվում են ամերիկյան վիզաներից, և քաղաքացիական հագուստով իշխանությունների ներկայացուցիչները նրանց ձերբակալում են փողոցում։ Ուսանողները և դպրոցները նշում են վիզաների չեղարկման պատճառների շուրջ «զանգվածային շփոթություն»:

Դատական հայցում նշվում է, որ հանրությունը չպետք է վախենա կարծիք հայտնելուց, սակայն Ռուբիոն և վարչակազմը փորձում են այն դարձնել արտոնություն՝ դաշնային պաշտոնյա լինելու դեպքում։ Նրանք արտաքսման գործընթաց են սկսել օրինական բնակվող ոչ քաղաքացիների դեմ՝ ԱՄՆ արտաքին քաղաքականության և Իսրայելի հետ կապված իրենց արտահայտությունների համար:

«Stanford Daily» թերթը և երկու անանուն ուսանողներ, որոնք եկել են ուսանողական վիզայով, հանդես են գալիս որպես հայցվոր։ Նրանք հրաժարվում են մասնակցել մերձավորարևելյան քաղաքական թեմաներով քննարկումներին՝ իրենց ուսանողական վիզան կորցնելու վախից: Հայցում պնդվում է, որ արտաքսման հիմքերը հակասում են ԱՄՆ Սահմանադրության խոսքի ազատությանը:

Դատական հայցում ընդգծվում է, որ եթե դաշնային օրենքը հակասում է Առաջին փոփոխության իրավունքներին, գերակշռում է Սահմանադրությունը:

Ավելի վաղ հաղորդվել էր, որ ԱՄՆ ներքին անվտանգության նախարարությունը ստուգում է օտարերկրյա ուսանողների սոցիալական ցանցերը՝ նրանց վիզաներից զրկելու համար։ Պետդեպարտամենտը ստուգած տվյալների հիման վրա որոշում է՝ արդյոք ուսանողի վիզան պետք է չեղյալ համարել: Եթե որոշում է՝ չեղյալ համարել, ներգաղթի և մաքսային ծառայության գործակալներին տեղեկացվում է ուսանողին ձերբակալելու և արտաքսելու մասին:

Մարկո Ռուբիոն ավելի վաղ հայտարարել էր, որ ՀԱՄԱՍ շարժման կողմնակիցներին կարտաքսեն ԱՄՆ-ից, ինչպես նաև նրանց վիզաները և կացության թույլտվությունները կչեղարկվեն։ Հետագայում նա նշեց, որ անկարգություններին մասնակից անձանց վիզաները կչեղարկվեն և նրանք կարտաքսվեն: