Շվեյցարիայի կառավարությունը պատրաստակամ է վերանայել Միացյալ Նահանգներին ուղղված իր առաջարկը՝ ի պատասխան ամերիկյան կողմի պլանավորած բարձր սակագների: Այս մասին հայտարարել է Շվեյցարիայի բիզնեսի նախարար Գի Պարմելինը։ Փորձագետները նախազգուշացնում են, որ նախագահ Դոնալդ Թրամփի հայտարարած 39% ներմուծման մաքսատուրքերը կարող են շվեյցարական տնտեսության համար ռեցեսիայի վտանգ ստեղծել։

Ուրբաթ օրը, երբ Թրամփը հայտարարեց Շվեյցարիայի նկատմամբ ամենաբարձր սակագներից մի քանիսը սահմանելու մասին՝ իր համաշխարհային առևտրային բարեփոխումների շրջանակներում, Շվեյցարիան ցնցվեց: Ոլորտային կազմակերպությունները զգուշացրին, որ տասնյակ հազարավոր աշխատատեղեր կարող են հայտնվել սպառնալիքի տակ։

Երկու օր անց, երկրի նախարարների կաբինետը հատուկ նիստ կանցկացնի՝ հետագա քայլերը քննարկելու նպատակով։ Գի Պարմելինը ասել է RTS հեռուստաընկերությանը, որ կառավարությունը կամրապնդի իր քայլերը, նախքան օգոստոսի 7-ը, երբ ԱՄՆ սակագներ կսկսեն գործել:

«Մենք պետք է լիովին հասկանանք, թե ինչ է տեղի ունեցել և ինչու է ԱՄՆ նախագահը այդ որոշումը կայացրել։ Երբ դա քննարկենք, կկարողանանք որոշել հետագա քայլերը։ Ժամկետները կարճ են, և մինչև 7-ը ինչ-որ հստակ արդյունքի հասնելն բարդ կլինի, բայց մենք կանենք ամեն ինչ՝ մեր առաջարկը վերանայելու և փոխըմբռնման գալու համար», — ասել է Պարմելինը։

Նրա խոսքով, Թրամփի ուշադրությունն ուղղված է Շվեյցարիայի հետ ԱՄՆ առևտրային հաշվեկշռի դեֆիցիտին, որն անցյալ տարի կազմել է 38,5 միլիարդ շվեյցարական ֆրանկ (48 միլիարդ դոլար): Շվեյցարիան դիտարկում է ԱՄՆ-ից հեղուկացված բնական գազ գնելու հնարավորությունը։

Մեկ այլ տարբերակ կարող է լինել շվեյցարական ընկերությունների հետագա ներդրումները ԱՄՆ-ում, որը Շվեյցարիայի համար դեղագործական արտադրանքի, ժամացույցների և սարքավորումների հիմնական շուկաներից է։ «Եվրամիությունն արդեն խոստացել է հեղուկացված գազ գնել: Շվեյցարիան նույնպես ներմուծում է ՀԲԳ, և սա կարող է լինել շուկայական և ներդրումային հարաբերությունների զարգացման ուղիներից մեկը», — նշել է նա։

Ե՛վ Գի Պարմելինը, և՛ Շվեյցարիայի նախագահ Կարին Կելլեր-Սաթերը պատրաստ են մեկնել Վաշինգտոն՝ բանակցությունները շարունակելու, եթե դա անհրաժեշտ լինի, ավելացրել է նախարարն։