Կամչատկայում տեղի ունեցած ուժգին երկրաշարժից հետո Չիլիի ծովափերը ենթարկվել են ցունամիի, որի ալիքների բարձրությունը հասել է 2,5 մետրի։ Այս տեղեկությունը հայտնել է երկրում աղետների դեմ պայքարի ազգային ծառայությունը:

Ամենաբարձր ալիքները՝ 2,5 մետր, արձանագրվել են Չիլիի կենտրոնական Բոյերուկա բնակավայրում։ Երկրորդ խոշորությամբ քաղաքի՝ Վալպարաիսոյի ափերին ալիքները հասել են 0,6 մետրի: Իսկ Արիկայում, որ գտնվում է երկրի հյուսիսում, ալիքների բարձրությունը կազմել է 1,1 մետր:

«Ուզում ենք հայտնել, որ տագնապը [ցունամիի սպառնալիքի կապակցությամբ] մնում է ուժի մեջ Արիկա-Պարինակոտայի մինչև Լոս Լագոս հատվածի բոլոր մարզերում, բացառությամբ Արաուկանիայի, որտեղ նախազգուշացումների մակարդակը իջեցվել է»,- հայտարարել է ներքին գործերի նախարար Ալվարո Էլիսալդեն մամուլի ասուլիսում։ Տվյալ շրջանների ափամերձ բնակիչներին խորհուրդ է տրվում մնալ անվտանգ վայրերում։

Իշխանությունները չեղարկել են Զատկի կղզու ցունամիի նախազգուշացումը, որտեղ անցած չորեքշաբթի տեղի էին ունեցել տարհանումներ: Այստեղ ալիքների բարձրությունը հասել է առավելագույնը 60 սանտիմետրի:

2025 թվականի հուլիսի 30-ի առավոտյան Կամչատկայի ափերի մոտ տեղի է ունեցել հզոր երկրաշարժ, որը հիշվում է որպես ամենաուժեղը 1952 թվականից ի վեր։ Ըստ իշխանությունների՝ երկրաշարժի մագնիտուդը կազմել է 8,8: Կամչատկայում հայտարարվել է բարձր պատրաստականության ռեժիմ, իսկ Սևերո-Կուրիլսքում առավոտյան զգացվել են հետցնցումներ, որի հետևանքով ալիքներ են առաջացել։ Ջրի առավելագույն բարձրությունը կազմել է մոտ 200 սմ, և այդ տարածքում բնակվող 2,4 հազար մարդ տարհանվել է անվտանգ վայրերի: