Իսրայելի երեսունմեկ կինոգործիչներ, նկարիչներ, գիտնականներ և նախկին քաղաքական գործիչներ միջազգային հանրությանը կոչ են արել կիրառել «կաթվածահար անող պատժամիջոցներ» Իսրայելի նկատմամբ, որպեսզի պարտադրեն հրադադար կնքել ՀԱՄԱՍ-ի հետ: Այս մասին ասվում է չորեքշաբթի The Guardian-ում հրապարակված նամակում:

Նամակի տակ իրենց ստորագրությունն են դրել Օսկար մրցանակի դափնեկիր Յուվալ Աբրահամը, Իսրայելի նախկին գլխավոր դատախազ Միխայիլ Բեն-Յաիրը, նախկին քաղաքական գործիչ Աբրահամ Բուրգը և Քնեսեթի նախկին անդամ Թամար Գոզանսկին:

Նամակում նշվում է. «Մեր երկիրը Գազայի ժողովրդին սովամահության է մատնել և քննարկում է միլիոնավոր պաղեստինցիների տեղահանումը»: Նամակի հեղինակները ընդգծում են՝ «Մեր երկրի և պաղեստինցի հարևանների խաղաղ ապագային հավատարիմ իսրայելցիներս սա գրում ենք խոր ամոթով և զայրույթով»:

Եվրոպական հանձնաժողովը երկուշաբթի հայտարարեց, որ կառաջարկի Եվրամիության երկրներին մասնակիորեն կասեցնել Իսրայելի հետ գիտական և տեխնոլոգիական համագործակցությունը Horizon ծրագրի շրջանակում: Սա կլինի որպես առաջին քայլ՝ ի պատասխան Իսրայելի գործողությունների Գազայում:

Հունիսին Մեծ Բրիտանիան, Ավստրալիան, Կանադան, Նոր Զելանդիան և Նորվեգիան պատժամիջոցներ են կիրառել Իսրայելի ազգային անվտանգության նախարար Իտամար Բեն-Գվիրի և ֆինանսների նախարար Բեզալել Սմոտրիչի դեմ:

Միևնույն ժամանակ, ԱՄՆ-ը և Եվրամիությունը պատժամիջոցներ են կիրառել Արևմտյան ափին բնակվող որոշ իսրայելցի բնակիչների և խմբավորումների վրա պաղեստինցիների նկատմամբ բռնության համար:

Աբրահամի «No Other Land» ֆիլմում նկարահանված պաղեստինցի ակտիվիստ Աուդա Խաթալինը մահացել է երկուշաբթի Արևմտյան ափի Ումմ ալ-Խայր գյուղում տեղի ունեցած բախումների ժամանակ: Ենթադրում են, որ նրան սպանել է որոնման տակ գտնվող գաղութարար Յինոն Լևին, որին Երուսաղեմի հաշտարար դատարանը ազատել է տնային կալանքի պայմաններում: