Ամեն տարի հուլիսի 30-ին նշվում է՝ Թրաֆիքինգի դեմ պայքարի միջազգային օրը, և սկսվում են դրա դեմ իրազեկման աշխատանքները: Դա հատկապես Հայաստանում կարևոր է, քանի որ այստեղ իրազեկումը գտնվում է պատշաճ մակարդակի վրա, պայմանավորված լինելով պետական աջակցությամբ։ Այս մասին, այսօր՝ հուլիսի 30-ին, մամուլի ասուլիսի ընթացքում հայտնեց «Աուդիովիզուալ լրագրողների ասոցիացիա» ՀԿ նախագահ Արզուման Հարությունյանը։

«Իրազեկման աշխատանքները կատարում ենք պետության ֆինանսավորմամբ ու գործողությունների ազգային ծրագրի շրջանակներում, որոնցում նշված է, որ իրազեկումը պետք է ծավալվի ոչ միայն խոցելի խմբերի, այլև լայն մշակութային շրջանակներում։ Սա հատկապես վերաբերում է երիտասարդությանը, ովքեր նոր են կյանքի ու աշխատանքի շուկայում։ Կարևոր է, որ նրանք գիտակցեն այս վտանգները և կարողանան դրանք կանխել։

Ի՞նչ է փոխվել այս ընթացքում։ Հին ժամանակներում թրաֆիքինգը կատարվում էր միջանձնային շփումներով, այժմ այն տեղափոխվել է ինտերնետային աշխարհ, որտեղ մարդիկ բաժանված են հասարակությունից ու աշխատունակ են ինտերնետային միջավայրում։

Դրա պատճառով մենք որոշեցինք իրազեկման և կանխարգելման աշխատանքներն էլ տեղափոխել ինտերնետ։ Եթե նախկինում մարդիկ համագործակցում էին համայնքային ձևերով, հիմա նպատակ ունենք, որ յուրաքանչյուր անհատ կարողանա ճիշտ գնահատել իրավիճակը ու լուծել ինքնանույնացման խնդիրները։ Մենք մշակել ենք պարզ 12 կետեր, և աշխատում ենք, որպեսզի ամեն մարդ իմանա դրանք։ Եթե այդ կետերից գոնե երկուսին համապատասխանում է, պետք է դիմի համապատասխան մարմիններին աջակցության ստանալու համար»,— ընդգծեց նա։

Արզուման Հարությունյանը նշեց, որ այս արշավի շրջանակներում լրատվամիջոցներով հատուկ հոլովակներ կցուցադրվեն, կլինեն հանդիպումներ դպրոցներում, մանկապարտեզներում. «Մեզ մոտ ծրագրերի և միջոցառումների ցանկը բավականաչափ մեծ է, այն կհրապարակվի մեր ոչ պաշտոնական antitrafficking.am կայքում։ Սա Հայաստանում միակ հայալեզու կայքն է՝ նվիրված անտիթրաֆիքինգին»։