Հուլիսի 29-ին շուրջ 700 սկաուտներ Հայ Մարմնակրթական Ընդհանուր Միության (Հ․Մ․Ը․Մ․) 12-րդ մարզախաղերի շրջանակներում ուխտավորաբար այցելեցին Մայր Աթոռ Սուրբ Էջմիածին։ Նրանք ուղեկցվում էին Կենտրոնական վարչության անդամներով։

Այդ այցի առիթով Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսի հանդիսապետությամբ Միածնաէջ Մայր Տաճարում անցկացվեց ավանդական օրհնության կարգ մարզախաղերի մասնակիցների համար։

Արարողության ավարտին Նորին Սրբությունն իր հայրական պատգամը փոխանցեց հայորդիներին՝ բարձր գնահատելով այն հանգամանքը, որ աշխարհի տարբեր վայրերից եկել են հայրենիք՝ մասնակցելու և մրցելու, ինչպես նաև ծանոթանալու և ընկերանալու միմյանց հետ։

«Խիստ կարևոր է ձեր մասնակցությունը այդպիսի վարժանքներին ու մրցույթներին, որոնք նպաստում են ձեր մարմնական և հոգևոր զորությանը՝ ապագա հաղթանակների հասնելու համար։

Այս վարժանքներն առիթ են տալիս նաև հոգու զորացման՝ Աստծուն ապավինելով դիմակայելու փորձություններին և դժվարություններին՝ նպատակ ունենալով հասնել հաղթանակի։

Նման միջոցառումներն ավելին են, քան պարզապես մարզական մրցումներ,» — ընդգծեց Հայոց Հայրապետը։

Խոսելով ժողովրդին և հայրենիքին հանդիպող դժվարությունների մասին՝ Նորին Սրբությունն ընդգծեց, որ արցախյան պատերազմի հետևանքով հայրենիքը դեռ դիմագրավում է անվտանգային լուրջ խնդիրներ, իսկ տեղահանված արցախահայերը շարունակում են գտնվել կարիքի մեջ։ Այդ թվում հասարակական կյանքում խորանում են անհամերաշխությունն ու անհանդուրժողությունը, ուստի առկա են ապագայի անորոշ զգացումներ։

«Հավատում ենք, որ արդարությունը կհաղթանակի։ Համախմբված ջանքերով չպետք է թույլ տանք, որ մեր կյանքում գերակշռեն կեղծիքը ու չարագործությունները։ Այս դժվարին իրավիճակում պետք չէ հուսահատվել։ Դուք, որ հասակ եք առել տարբեր երկրներում, պատասխանատվություն ունեք մեր ժողովրդի ապագան կերտելու գործում՝ ձեր ուժերն ի սպաս դնելով ազգի և հայրենիքի համար։

Անհրաժեշտ է ամրապնդել ազգային միաբանությունը և պահպանել Հայաստան-Սփյուռք կապերը։ Ձեր հայրենաճանաչությունը, ազգային ինքնագիտակցության բարձրացումը նշանակալից է մեր պետականության համար։ Դուք մեր ազգի ապագան եք, հայոց հարատևության երաշխիքը։

Ջերմագին ընդունելով ձեզ հայրենիքում՝ դուք մեծ մեկնաբանություն եք տալիս հայրենաբնակ մեր ժողովրդին, ձեր հասակակիցներին՝ հայրենիքի սիրո կարևորությամբ, ուժ առնելով հարազատ հողից և մեր անցյալի նվիրական գործերից», – ասաց Հայոց Հովվապետը՝ հորդորելով սկաուտներին սիրո ու հավատի մեջ մնալուն։

Անդրադարձավ նաև ազգային ինքնության պահպանման կարևորությանը՝ հպարտությամբ հիշատակելով Հայոց պատմությունը, նախնյաց ժառանգությունը, արդարության մղված պայքարի հզոր ոգին։

«Միշտ արիասիրտ դիրք ընդունեք հայ ժողովրդի իրավունքների պաշտպանության հարցում։ Ձեր այցի այս օրերը թող իրենց տեղը գտնեն նաև ձեր նվիրումի և ազգի համար օգտակար լինելու առումով», – ասաց Ամենայն Հայոց Հայրապետը՝ շնորհակալություն հայտնելով միջոցառման կազմակերպիչներին։

Ի վերջո, Նորին Սրբությունն աղոթեց, որ հայորդիները ապրեն առողջ և երջանիկ, լինեն հայրերի արժանի զավակներ և կատարեն նրանց տեսիլքները։