Երևանի ավագանու «Քաղաքացիական պայմանագիր» խմբակցության ներկայացուցիչ Միքայել Խաչատրյանը իր «Ֆեյսբուք»-ի էջում քննարկել է մայրաքաղաքի վարչական շրջաններում ապօրինի կառույցների ապամոնտաժման հետ կապված դժգոհությունները։

«Հարգելի երևանցիներ և ընկերներ,

Երևանի քաղաքապետարանը և վարչական շրջանները շարունակելու են ապօրինի կառույցների ապամոնտաժումը։ Տարիների ընթացքում զավթված տարածքները վերադարձվում են, և հետագայում էլ կվերադարձվեն երևանցիներին։ Այստեղ այլընտրանք չկա։

Հիշեցնենք, որ ՀՀ օրենսդրությամբ, ինքնակամ շինությունները (որոնք կառուցվել են առանց համապատասխան թույլտվությունների կամ խախտելով նորմատիվ պահանջները) պետք է ապամոնտաժվեն։

ՀՀ քաղաքացիական օրենսգրքի 188-րդ հոդվածը և «Քաղաքաշինության մասին» օրենքը նախատեսում են, որ այն շինությունները, որոնք բազմակի հանձնաժողովային քննարկումների արդյունքում չեն ճանաչվել օրինականացման ենթակա, պետք է ապամոնտաժվեն սեփական նախաձեռնությամբ։

Խորհրդում ենք այն քաղաքացիներին, որոնց շինությունները համապատասխանում են վերևում նշված պայմաններին, իրականացնել ինքնուրույն ապամոնտաժում։ Հակառակ դեպքում՝ համայնքը կիրականացնի պարտադրական ապամոնտաժում՝ օրենքով սահմանված կարգով, ինչը կբերի Երևանի համայնքին լրացուցիչ ֆինանսական ու տեխնիկական ծախսերի:

Այս ռեսուրսները կարող են ավելի արդյունավետ օգտագործվել համայնքային կարիքների համար, ուստի ակնկալում ենք ձեր ըմբռնումն ու համագործակցությունը:

Մեր հրաշք մայրաքաղաքը գեղեցկանում է ամեն օր, եկեք սիրենք այն»,- ընդգծել է նա։

Հիշեցնենք, որ հուլիսի 29-ին ապամոնտաժվել են Երևանի Տիգրան Մեծ փողոցում տեղադրված կրպակները: