Տրանսպորտի և կապի նախարար Դավիթ Խուդաթյանը հուլիսի 17-ին կառավարության նիստից հետո լրագրողներին տված մեկնաբանության մեջ խոսեց միասնական երթուղիների քաղաքականության շարունակականության մասին: Նա հատկապես ընդգծեց, որ Կոտայքի մարզում այս համակարգն արդեն ամբողջությամբ գործում է:

«Պռոշյան և Քասախ համայնքներում որոշակի դժվարություններ առաջացան՝ կապված Երևանի հետ մերձակայության հետ: Նախկինում Երևանի քաղաքապետարանը կազմակերպում էր ուղևորափոխադրումներ այդ տարածքներում, սակայն այժմ այդ ծառայությունները տեղափոխվել են քաղաքի այլ բնակելի վայրեր՝ դարձնելով այն ավելի հարմար բնակիչների համար: Մեր միջմարզային երթուղիների հիմնական սկզբունքն այն է, որ Երևանում ունենանք հստակ վերջնակետեր՝ հիմնականում ավտոկայաններում: Իսկ Երևանի տրանսպորտային համակարգն ապահովում է քաղաքի ներսում կապը՝ ավելի բարելավելով ուղևորների փոխադրման պայմանները: Քասախի և Պռոշյանի բնակիչների խնդիրը մանրամասն քննարկել ենք. կարծում եմ՝ համապատասխան լուծում տրվեց, և հույս ունեմ, որ այս հարցը լուծված է»,- ասաց նախարարը:

Խուդաթյանը նշեց նաև, որ անցյալ ամսում նրանք արդեն գործարկել են միասնական երթուղիներ դեպի Թալինի և Ապարանի տարածաշրջաններ: «Արագածոտնի մարզում տեղի է ունենում նաև Աշտարակի ուղղությամբ միասնական երթուղու ներդրում: Առաջիկա օրերին այն լիովին կգործարկվի: Կարող ենք արձանագրել, որ այս տարի Արագածոտնի մարզի միասնական երթուղիների խնդիրը լուծված կլինի, իսկ հետո կշարունակենք մյուս մարզերում»,- ավելացրեց ՏԿԵ նախարարը: