Հուլիսի 17-ի գիշերը ռուսական զինված ուժերը անօդաչու թռչող սարքերով զանգվածային հարձակում են գործել Ուկրաինայի Դնեպր քաղաքի վրա։ Դնեպրոպետրովսկի մարզային վարչակազմի ղեկավար Սերգեյ Լիսակի հայտարարության համաձայն՝ քաղաքի օդային տարածքում խոցվել է 22 անօդաչու, սակայն որոշ «Շահեդ» դրոններ հասել են թիրախներին։ Հարձակման հետևանքով մեկ մարդ զոհվել է, ևս հինգը` վիրավորվել։

«Հիվանդանոցում են 35, 37, 40 և 52 տարեկան տղամարդիկ: Երեքը ծանր վիճակում են», — նշել է Լիսակը։ Նրա խոսքով՝ Դնեպրի տարբեր մասերում, մասնավորապես Դնեպրովսկի շրջանում, բռնկվել են մի քանի հրդեհներ։ Վնասվել է արդյունաբերական օբյեկտ, սակայն կոնկրետ որն է, պարզ չէ:

Նույն գիշեր Ռուսաստանի զինված ուժերը «Գրադ» ռեակտիվ կրակահերթ համակարգերի օգնությամբ հարվածներ է հասցրել նաև Նիկոպոլ քաղաքին։ Օգտագործվել են նաև FPV-անօդաչուներ, որոնք պայթեցրել են արկեր։ Հինգ մարդ է վիրավորվել, չորսը` հոսպիտալացված են միջին և ծանր վնասվածքներով։ Լիսակի խոսքով՝ վնասվել են մասնավոր տներ և տնտեսական օբյեկտներ։

Մեկ օր առաջ՝ հուլիսի 16-ին, ուշ երեկոյան Ռուսաստանը հրթիռակոծել է Դոնեցկի մարզի Դոբրոպոլիե բնակավայրը, կիրառելով 500 կիլոգրամանոց ավիաբոմբ։ Տարածաշրջանի ռազմական վարչակազմի ղեկավար Վադիմ Ֆիլաշկինի տվյալներով՝ երկու մարդ զոհվել է, 27-ը` վիրավորվել։ Քանդվել կամ վնասվել է 54 խանութ, 13 շենքի 304 բնակարան և ութ ավտոմեքենա։

Ուկրաինայի նախագահ Վոլոդիմիր Զելենսկին հարձակումը բնութագրել է որպես սարսափելի ահաբեկչական գործողություն։ «Նրանց ուժերը ոչ մի ռազմավարական նպատակ չեն հետապնդել, այլ պարզապես փորձել են վերացնել հնարավորինս շատ անմեղ մարդկանց։ Այս դաժանությունն ամբողջ Ռուսաստանի դեմքն է։ Մենք անպայման պատասխան կտանք», — ասել է Զելենսկին։