Առաջադեմ տեխնոլոգիաները հնարավորություն են տվել հնագետներին պարզել չորս էգ ավանակների ծագումը, որոնք օգտագործվել են հին իսրայելական քաղաքում ծիսական զոհաբերությունների ժամանակ։ Այս հայտնագործությունը նշանակալի է, քանի որ այն վերահաստատում է, որ մեր պատկերացումները 4500 տարի առաջվա քանանա-իսրայելական հարաբերությունների մասին պետք է թարմացվեն։

PLOS One ամսագրում հրապարակված ուսումնասիրության մեջ հնագետները կիրառել են իզոտոպային վերլուծություն՝ պարզելու համար, թե որտեղից են բերվել Իսրայելի Թել էս-Սաֆի քաղաքի միջին խավի քանանական թաղամասում հայտնաբերված զոհաբերված ավանակները։

Այս զարմանալի թաղումները ոչ միայն նոր լույս են սփռում վաղ բրոնզի դարում այս տարածաշրջանում բնակված հին քանանացիների ծիսական սովորույթների վրա, այլև հաստատում են եգիպտացիների և քանանացիների միջև գոյություն ունեցած ակտիվ առևտրական կապեր։ Մասնավորապես, պարզվել է, որ ավանակներից մի քանիսը եգիպտական ծագում ունեն։ Մինչ այս ուսումնասիրությունը գիտնականները կարծում էին, որ եգիպտացիներն ու քանանացիները բրոնզի դարում գործնականորեն չեն շփվել։

Հետազոտական խումբը հայտնաբերել է երիտասարդ էգ ավանակների չորս ամբողջական կմախք։ Դրանք հատուկ թաղվել էին տան հատակի տակ՝ որպես «հիմքի ծիսական զոհաբերություն»։

Ավանակների ատամների իզոտոպային վերլուծությունը ցույց է տվել, որ դրանք Եգիպտոսի Նեղոսի հովտից են բերվել։ Այս փաստը հնարավորություն է տվել գիտնականներին եզրակացնել, որ կենդանիները մտցվել են տարածաշրջան հատուկ ծիսական նպատակներով։ Հետազոտողները նշել են, որ քանի որ բոլոր ավանակները էգ են եղել և պտղաբեր տարիքում, դրանք այդ ժամանակվա համար կարող էին լինել մեծ արժեք ներկայացնող կենդանիներ։ Միևնույն ժամանակ, պեղումների վայրում հայտնաբերվել է նաև մեկ այլ ավանակ, որը տեղում է մեծացել, և որի մնացորդները խառնված են եղել ոչխարների ու այծերի հետ։ Սա հիմք է տալիս ենթադրելու, որ տեղի բնակիչները օգտագործել են որոշ կենդանիներ սննդի համար։

Ավանակների եգիպտական ծագումը հանգեցրել է այն եզրակացության, որ եգիպտա-քանանական հարաբերությունների վերաբերյալ առկա պատկերացումները ճշգրիտ չեն եղել։ Այս զոհաբերված կենդանիները հուշում են, որ երկու ժողովուրդներն էլ միմյանց հետ ակտիվ առևտրական կապեր են ունեցել։