Հունաստանի վարչապետ Կիրիակոս Միցոտակիսը Կրետե կղզի մեկնող միգրանտների հոսքի աճի մասին խոսել է սոցցանցերում տեղադրած իր ամենշաբաթյա գրառման մեջ: Նա հստակեցրել է, որ կառավարությունը չի թողնի, որ Հունաստանը դառնա Եվրոպայի առանց պաշտպանության մուտքի կետ:

«Միգրացիան հարց ժամանակավոր ճգնաժամ չէ, այլ իրողություն, որն անընդհատ ձևափոխվում է. այն կարող է ուժեղանալ կամ թուլանալ, բայց երբեք չի վերանա: Անխիղճ մաքսանենգները փոխում են իրենց մարտավարություններն ու ուղիները՝ շահագործելով ամենաթույլ օղակները: Այս պահին այդ թույլ օղակը Լիբիան է», – նշել է Միցոտակիսը:

Վարչապետը նշել է, որ Հունաստանը ձեռնարկելու է բոլոր անհրաժեշտ քայլերը՝ Միջերկրական ծովով անօրինական միգրացիայի նոր երթուղու ստեղծումը կանխելու համար: Նա հիշեցրել է 2020 թվականին Թուրքիայի հետ սահմանի՝ Էվրոսում տեղի ունեցած ճգնաժամը, երբ հազարավոր միգրանտներ փորձել էին անցնել Հունաստան:

«Մեր ուղերձը պարզ է. Հունաստանը չի թողնի, որ ստեղծվի նոր անօրինական մուտքի ճանապարհ դեպի երկիր և Եվրոպա: Ինչպես Էվրոսում 2020-ին, այժմ էլ կանենք ամեն ինչ՝ դրա դեմ պայքարելու համար», – հաստատել է Միցոտակիսը:

Նա նաև հաղորդել է, որ կառավարությունն արդեն սկսել է արտակարգ միջոցներ՝ նոր միգրացիոն երթուղին արգելափակելու համար և կոչ է արել Լիբիայի իշխանություններին՝ համագործակցելու Հունաստանի հետ:

«Նախաձեռնել ենք արտակարգ միջոցներ՝ Հյուսիսային Աֆրիկայից եկող անօրինական միգրացիայի ուղին փակելու համար: Այս պայքարում Լիբիային կոչ ենք անում համագործակցել՝ հաշվի առնելով, որ Հունաստանի միջոցով են անցնում այդ երկրի Եվրամիության հետ կապերը: Մեր դիրքորոշումը կոշտ է, բայց օրինական ու հիմնավորված: Շատ քաղաքացիներ անհանգստացած են, և ես հասկանում եմ նրանց: Մենք չենք թաքցնում իրողությունն ու չափերը: Խնդիրն իրական է, և մեր պատասխանը մեկն է՝ Հունաստանը չի լինի պաշտպանազուրկ դարպաս», – ընդգծել է Միցոտակիսը: