Առողջապահության նախարարության ենթակայության տակ գտնվող «Կախվածությունների բուժման ազգային կենտրոնի» պաշտոնական էջ համարվող ֆեյսբուքյան էջում, որտեղ նախկինում տեղադրվում էին կենտրոնի գործունեությունը վերաբերող նորություններն ու հայտարարությունները, այսօր առավոտյան սկանդալային տեսանյութ է հայտնվել։ Տեսանյութում ներկայացված են Առողջապահության նախարար Անահիտ Ավանեսյանի և նրա տեղակալ Լևոն Հակոբյանի հետ կապված կադրեր։

Տեսանյութին կցված գրառման մեջ ասվում է. «Կախվածությունների բուժման ազգային կենտրոնի նոր համակարգողն է սույն արարածը՝ ԱՆ փոխնախարար պարոն Լևոն Հակոբյանը: Սալյուտ: Կախվածությունների բուժման ազգային կենտրոնի լաբորատոր ծառայության ղեկավարը ողջունում է սույն քայլը»:

Տեսանյութում օգտագործված են հին տարեգրություններ, որտեղ Լևոն Հակոբյանը խոսում է Կարապետյան ընտանիքի և «Տաշիր» ընկերության բարեգործական ծրագրերի մասին։

Հիշատակենք, որ Լևոն Հակոբյանը 2019 թվականի մարտին նշանակվել էր Առողջապահության նախարար Արսեն Թորոսյանի (ներկայումս ՔՊ խմբակցության պատգամավոր) տեղակալ, սակայն մի քանի ամիս անց հեռացվել է պաշտոնից։ Մինչ այդ նա զբաղեցրել է «Տաշիր Ինվեստ Գրուպ»-ի տնօրենի պաշտոնը։ 2020-2023 թվականներին Հակոբյանը կրկին վերադարձել էր «Տաշիր Ինվեստ Գրուպ»-ի ղեկավարի պաշտոնին։

2023-2024 թվականներին նա նշանակվել է Առողջապահության նախարար Անահիտ Ավանեսյանի խորհրդական, իսկ 2025 թվականի մարտի 27-ին վարչապետի որոշմամբ դարձել է նախարարի տեղակալ։

Տեսանյութի հրապարակումից մի քանի ժամ անց Առողջապահության նախարարությունը պաշտոնական հայտարարություն է հրապարակել՝ նշելով, որ «Կախվածությունների բուժման ազգային կենտրոն» էջը այլևս չի պատկանում կամ ղեկավարվում Առողջապահության նախարարության կամ Կախվածությունների բուժման կենտրոնի կողմից, և դրա բովանդակությունը արտահայտում է միայն կենտրոնի նախկին ղեկավարի անձնական տեսակետը։

Նախարարության հաղորդագրության մեջ ասված է. «Կախվածության բուժման ազգային կենտրոնի գործունեությունը շարունակաբար լուսաբանվում է Առողջապահության նախարարության պաշտոնական կայքերում, քանի որ այն գտնվում է մեր ենթակայության ներքո։ Վերջին շրջանում այդ անհատի կողմից հրապարակումների բնույթի և բովանդակության վերաբերյալ նախարարությունն արձագանքել է դատական մարմիններին։ Մոտ ապագայում կներկայացնենք Կախվածությունների բուժման ազգային կենտրոնի նոր պաշտոնական էջը՝ թարմացված ձևաչափով»։