Հարավային Կորեան, Ճապոնիան և ԱՄՆ-ն ուրբաթ օրը միասին զորավարժություններ են անցկացրել միջազգային ջրերում՝ ԱՄՆ-ի B-52 ռազմավարական ռմբակոծիչի և դաշնակիցների կործանիչների մասնակցությամբ։ Այդ մասին հայտնել է Հարավային Կորեայի պաշտպանության նախարարությունը։

Սա այս տարի Կորեական թերակղզում B-52H ռմբակոծիչի մասնակցությամբ առաջին մարտավարժությունն է։ Իշխանությունների տված տեղեկատվությամբ՝ վարժանքների նպատակը զսպման քաղաքականության ամրապնդումն է՝ Հյուսիսային Կորեայի աճող միջուկային և հրթիռային սպառնալիքների պայմաններում։

Նույն օրը երեք երկրների պաշտպանության նախարարները Սեուլում անցկացրել են իրենց տարեկան եռակողմ խորհրդակցությունը։ Պաշտոնական հայտարարությունում նշվում է, որ կողմերը շեշտել են համագործակցության կարևորությունը՝ Կորեական թերակղզու և Հնդկա-Խաղաղօվկիանոսյան տարածաշրջանի անվտանգության հարցերի լուծման համար։

«Մենք ճանապարհ ենք հարթում դեպի այն ապագան, որտեղ գործընկերությունը զարգանում է կանոնավոր ու խորը հարաբերությունների միջոցով՝ սկսած ունակությունների աճից մինչև պատասխանատվության բաշխում», — ասել է ԱՄՆ-ի զինված ուժերի շտաբի պետ գեներալ Դեն Քեյնը։

Նա նաև նշել է, որ Հյուսիսային Կորեան և Չինաստանը «ռեկորդային ռազմական ամրապնդում են իրականացնում» ու պարզ դրսևորում են իրենց շահերի պաշտպանության մտադրությունը։ «Այս փաստը պետք է հաշվի առնել», — ավելացրել է Քեյնը։