Մերսինի համալսարանի հնագիտական թիմը Ուզունգաբուրջում (Թուրքիա) հայտնաբերել է հին հունական այբուբենի տառերով ձևավորված կախովի կշեռքներ և հինգ երկաթե կշռաքարերից բաղկացած եզակի հավաքածու։ Գիտնականների գնահատմամբ, գտածոն մոտ 1600 տարեկան է։ Հայտնագործության մասին տեղեկությունները հրապարակվել են «Archaeology Reports Online (ARO)» գիտական ամսագրում։

Ուզունգաբուրջը, որը գտնվում է Սիլիֆքեից 30 կմ հեռավորության վրա, հայտնի է իր հելլենիստական և հռոմեական ժամանակաշրջանների պահպանված հուշարձաններով՝ տաճարներ, սյունաշարեր, շատրվաններ և թատրոն։ Նոր պեղումները կատարվել են քաղաքի գլխավոր փողոցներից մեկում, որտեղ, ենթադրաբար, տեղակայված է եղել առևտրային հրապարակը։

Հնագետներին հաջողվել է բացահայտել տառաձև կշռաքարերի հավաքածու, որոնք, ըստ վարկածի, օգտագործվել են քաշը չափելու համար։ Պրոֆեսոր Ումիթ Այդինօղլուի բացատրությամբ՝ յուրաքանչյուր կշռաքար համապատասխանում է լիտր չափման ստանդարտին։ Կշռաքարերի քաշը տատանվում էր 150 գրամից մինչև 1,5 կիլոգրամ։

«Այս գտածոն այդ ժամանակաշրջանի չափման համակարգի ամբողջական օրինակն է։ Տառային նշանները, ամենայն հավանականությամբ, արտահայտում են տեղական առևտրական կանոնները կամ առանձին վաճառականի անհատական մոտեցումը»,— նշել է Այդինօղլուն։

Այս հայտնագործությունը հաստատում է Ուզունգաբուրջի կարևորությունը որպես ուշ անտիկ դարաշրջանի (4-7-րդ դարեր) առևտրային հանգույց։ Կշեռքների և կշռաքարերի կողքին պեղումների ժամանակ հայտնաբերվել են նաև մետաղադրամներ, գործիքներ և առևտրային կառույցների մնացորդներ։