ՀՀ Ազգային ժողովի փոխխոսնակ Հակոբ Արշակյանը հերքել է, որ հղի կնոջը հրել է։ Պաշտոնյայի խոսքով՝ նա միայն փորձել է ազատել իր ձեռքը։ Արշակյանը այս մասին հայտարարել է խորհրդարանում լրագրողների հետ զրույցում՝ մեկնաբանելով իր մասնակցությամբ տարածված տեսանյութը։

Տեսագրությունը, որտեղ երևում է, թե ինչպես է Արշակյանը շփոթմունքի մեջ գցում հղի օգնականին, համացանցում տարածվել էր «Հակոբ Արշակյանը հրում է ընդդիմադիր պատգամավորի 7 ամսական հղի օգնականին» վերնագրով։

«Խնդրում եմ՝ որակումներ տալիս առաջնորդվեք ճշմարտությամբ, ոչ թե ձեր մեկնաբանություններով։ Տեսանյութերում պարզ երևում է, որ մի կին բռնել է իմ ձեռքը, և ես պարզապես ազատել եմ այն։ Ես հենց նոր ելույթ էի ունենում և նշել էի, որ եթե իմ գործողությունները որևէ մեկի համար անհարմարություն են ստեղծել, ներողություն եմ խնդրում»,― ասել է Արշակյանը։

Հիշատակենք, որ Հայաստանի ԱԺ «Հայաստան» խմբակցության անդամ Արթուր Սարգսյանը խորհրդարանի արտահերթ նիստում հայտարարել էր, որ իրեն պատգամավորական անձեռնմխելիությունից զրկելու և քրեական հետապնդում սկսելու մասին որոշումն արդեն կայացված է։ Նա պնդել է, որ ահաբեկչության մեղադրանքները կեղծ են ու քաղաքական մոտիվացիա ունեն։ Սարգսյանը նշել է, որ վստահ լինելով՝ վերջնական որոշումն արդեն կա, տվյալ ժամանակահատվածը որոշել է անցկացնել ընտանիքի հետ, այցելել եկեղեցի, այնուհետև ներկայանալ ՀՀ քննչական կոմիտե։

Պատգամավորի ելույթից հետո Ազգային ժողովում լարված իրավիճակ է ստեղծվել, և ԱԺ փոխխոսնակ Ռուբեն Ռուբինյանը ընդմիջում է հայտարարել։