Վրաստանի դատախազությունը պատրաստվում է բողոքարկել Թբիլիսիի քաղաքային դատարանի որոշումը, որը ազդեցիկ գործարար Գիորգի Ռամիշվիլիի համար որպես խափանման միջոց սահմանել է 70 հազար լարի (վրացական արժույթ) գրավ։ Այս մասին լրագրողներին հայտնել է դատախազ Թորնիկե Մախաթաձեն։

Silk Road Group, Silknet և Euronews Georgia ընկերությունների հիմնադիր Գիորգի Ռամիշվիլին ձերբակալվել է հուլիսի 6-ին՝ Թբիլիսիի օդանավակայանում։ Նրան մեղադրանք է առաջադրվել ապօրինի զենք կրելու մեջ։ Զենքը, թեև գրանցված է եղել Ռամիշվիլիի անվան տակ, նա չի ունեցել այն կրելու իրավունք։

«Մեղադրանքի կողմը, իհարկե, համաձայն չէ այս որոշման հետ և այն կբողոքարկի Վերաքննիչ դատարանում», — նշել է դատախազությունը։

Դատարանը որոշել է Ռամիշվիլիին ազատ արձակել՝ գրավի դիմաց, սակայն մեղադրանքի կողմը պնդել է, որ նրան պետք է կալանքի տակ պահել նախաքննության ողջ ընթացքում։ Դատավորները համաձայնել են, որ կան խափանման միջոց կիրառելու հիմքեր, սակայն գերադասել են գրավը՝ կալանքի փոխարեն։

Ռամիշվիլիի փաստաբան Իրմա Չկադուան մերժել է, որ ձերբակալությունը կապված է քաղաքական գործընթացների հետ։ Նրա խոսքով՝ դա եղել է անսպասելի սխալ։

«Անսպասելի բան տեղի ունեցավ։ Դա նույնիսկ կարելի է սխալ անվանել, բայց Ռամիշվիլին հնարավորություն կունենա հայտարարություն անել այս ամենի և հասարակության մեջ բարձրացված խնդիրների մասին», — ասել է Չկադուան։

Վրաստանի օրենքներով, «Զարալա» մականունով Գիորգի Ռամիշվիլիին սպառնում է 4-ից 7 տարվա ազատազրկում, եթե մեղադրանքը հաստատվի։