Իսրայելի պաշտպանության նախարար Իսրայել Կացը հայտարարել է Գազայի հատվածում բնակվող պաղեստինցիներին Ռաֆահի ավերակների վրա մեծ ճամբար տեղափոխելու ծրագրերի մասին։ Մասնագետները դա գնահատում են որպես մարդկության դեմ հանցագործությունների հավանական սցենար։

«Haaretz»-ի տվյալներով՝ Կացը հրամայել է իսրայելական բանակին պատրաստվել Ռաֆահի տեղում «մարդասիրական քաղաք» ստեղծելուն։ Պաղեստինցիները ճամբար մտնելուց առաջ կանցնեն «անվտանգության ստուգում» և չեն կարողանա լքել այն՝ գտնվելով իսրայելական զինված ուժերի լրիվ վերահսկողության տակ։

Առաջին փուլում նախատեսվում է տեղահանել մոտ 600 հազար մարդու, հիմնականում ալ-Մավասի շրջանի ճամբարներում գտնվողներին։ Հետագայում Գազայի բոլոր բնակիչները պետք է տեղափոխվեն այնտեղ։ Կացը հստակեցրել է, որ ծրագիրը կիրականացվի՝ ասելով. «Դա տեղի կունենա»:

2024-ի սկզբից ի վեր Իսրայելի վարչապետ Բենիամին Նեթանյահուն և այլ գործիչներ քարոզում են պաղեստինցիների «կամավոր» վերաբնակեցումը Գազայի սահմաններից դուրս։ Այս գաղափարը առաջադրել է Դոնալդ Թրամփը՝ առաջարկելով «մաքրել» տարածքը՝ բնակչության զգալի մասի տեղահանմամբ։

Սակայն իրավաբանները նշում են, որ ծրագիրը խախտում է միջազգային իրավունքը։ «Կացը նկարագրում է մարդկության դեմ հանցագործության ծրագիր։ Սա էթնիկ զտում է», — ասել է իրավապաշտպան Մայքլ Սֆարդը։ Նրա խոսքով՝ շրջափակման և բռնության պայմաններում «կամավոր» տեղահանումն անթույլատրելի է։

Կացի հայտարարությունը կատարվել է Նեթանյահուի՝ Վաշինգտոն կատարելիք այցից առաջ, որտեղ նա կքննարկի հրադադարի հնարավորությունը։ Նախարարն ասել է, որ ճամբարի նախապատրաստումը կարող է սկսվել հենց հրադադարի ժամանակ։ Իսրայելը նաև փնտրում է երկրներ, որոնք պատրաստ են ընդունել տեղահանվածներին։

Սպիտակ տան ելույթում Նեթանյահուն նշել է, որ ԱՄՆ-ն ու Իսրայելը համագործակցում են այլ երկրների հետ՝ պաղեստինցիների համար «ավելի լավ ապագա» ապահովելու համար։ «Յուրաքանչյուրը կարող է ընտրել՝ մնալ կամ լքել», — ասել է նա։

Առաջին անգամ չէ, որ Իսրայելի ղեկավարությունն առաջ է մղում Գազայի բնակչության վերաբնակեցման գաղափարը։ Ավելի վաղ ֆիննախարար Բեզալել Սմոտրիչը խոսել է տարածքում նոր բնակավայրեր կառուցելու անհրաժեշտության մասին։

Մասնագետները, այդ թվում Երուսաղեմի Եբրայական համալսարանի պրոֆեսոր Ամոս Գոլդբերգը, նշում են, որ խոսքը «համակենտրոնացման ճամբարի» ստեղծման մասին է։ «Սա փակ տարածք է առանց նորմալ կենսապայմանների, որտեղ մարդիկ զրկված կլինեն ազատությունից», — ասել է նա։