«Փաստ» թերթը հաղորդում է. «Մենք բազմիցս նշել ենք, որ իշխանությունները ցանկանում են ռուսական հեռուստաալիքները հեռացնել Հայաստանի մուլտիպլեքսից: Սա հստակ «արևմտյան ուղղված» պահանջ է, սակայն Նիկոլ Փաշինյանն ու նրա շրջապատը մինչ այժմ զերծ են մնացել կոնկրետ գործողություններից, չնայած որ բարձրաստիճան պաշտոնյաներ բազմիցն ակնարկել են այս հարցը: Վերջին օրերին այս թեման կրկին բարձրացել է հանրային քննարկումներում»:

Հատկանշական է, որ Հայաստանի արևմտամետ որոշ խմբավորումներ հուլիսի 9-ին նախատեսում են բողոքի ակցիա անցկացնել բարձր տեխնոլոգիական արդյունաբերության նախարարության շենքի դիմաց: Նրանց պահանջները ներառում են՝ «ռուսական պետական հեռուստաալիքների անհապաղ անջատումը հանրային մուլտիպլեքսից և կաբելային ցանցերից, ինչպես նաև «Սպուտնիկ Արմենիայի» գործունեության արգելումը Հայաստանի տարածքում»:

Այս խմբավորումների հայտարարություններին զուգահեռ, Հեռուստատեսության և ռադիոյի հանձնաժողովը (ՀՌՀ) նույնպես մեկնաբանություն է տվել՝ նշելով մուլտիպլեքսում ռուսական ալիքների հեռարձակման դադարեցման հնարավորությունը: ՀՌՀ-ն այդ գործընթացը ներկայացնում է որպես «հասարակության լայն շերտերի պահանջ», թեև ուղղակի հղում չի անում կոնկրետ հասարակական վերահսկողության արդյունքներին:

Սակայն, ի տարբերություն արևմտամետ խմբերի, ՀՌՀ-ն խուսափում է խոսել կաբելային ցանցերից ռուսական ալիքների արգելման մասին: Պետական հանձնաժողովը նշում է, որ այդ միջամտությունը կհանգեցնի մարդկանց տեղեկատվության և վճարովի ծառայությունների համար նախատեսված փաթեթների ընտրության իրավունքի ոտնահարման: Բացի այդ, կաբելային ցանցերը պատկանում են մասնավոր օպերատորներին, ովքեր իրավունք ունեն ինքնուրույն որոշելու սպառողներին առաջարկվող հեռուստաալիքների ցանկը: Այս տրամաբանությամբ, այլ քաղաքական ուժեր կարող են պահանջել նաև արևմտյան այն հեռուստաալիքների մուտքագրման արգելումը, որոնք, իրենց կարծիքով, «մանիպուլյատիվ կամ քարոզչական բովանդակություն են փոխանցում»:

Ավելի մանրամասն տեղեկությունների համար կարող եք ծանոթանալ «Փաստ» օրաթերթի այսօրվա տպագիր տարբերակին