Ուկրաինայի պաշտպանության նախարարության Գլխավոր հետախուզական վարչության միջազգային լեգիոնի մարտիկ Գիմլի մականունով մի զինծառայող «Army TV»-ին տված հարցազրույցում նշել է, որ իր ծանոթները, ովքեր մասնակցել են Իրաքի և Աֆղանստանի պատերազմներին, այս հակամարտությունը համարում են լրիվ այլ բան։ «Մենք այստեղ չենք պայքարում ապստամբների կամ փոքր խմբերի դեմ։ Սա մեծ բանակների ուղղակի բախում է։ Եվս մեկ կարևոր գործոն՝ տեխնոլոգիաներն են։ Սրանք անօդաչու թռչող սարքերն են ու դրանց հետ կապված ամեն ինչ»,— բացատրել է նա։ Գիմլին մասնակցել է Բախմուտի մարտերին։

Զինծառայողը նշել է, որ մինչ այդ երբեք չի մասնակցել ռազմական հակամարտություններին, ուստի չգիտեր, թե ինչպես կվարվեր իրական մարտական պայմաններում։ Նրա խոսքերով՝ մարտերը քննարկելն ու դրանք մասնակցելը լրիվ այլ բան են. «Առաջին մարտերը, որոնց մասնակցեցի, Բախմուտի հյուսիսում էին՝ 2023-ի սկզբին։ Եվ դա խելագարություն էր։ Դա լրիվ այլ բան էր, քան այն ամենը, ինչ երբևէ ապրել եմ։ Այդ պահին հասկացա, որ ոչ մի մարզումն ինձ չի կարող լիովին պատրաստել դրա համար»։

Գիմլին ընդգծել է, որ նման տիպի մարտերում շատ ավելի հաճախ են տեղի ունենում մոտ հեռավորությունների բախումներ։ Մեկ այլ անսպասելի բան էլ անօդաչուների տարածվածությունն էր. «2023-ի սկզբի հետ համեմատած՝ տարբերությունն հսկայական է։ Այն ժամանակ մեր գլխավոր վախն այն էր, որ անօդաչուն կբացահայտի մեզ ու կուղղորդի հրանոթներին կամ ինչ-որ բան կգցի։ Իսկ այժմ դրանք այնքան շատ են, որ գործ ունենք բոլորովին այլ սպառնալիքի հետ»։

Հիշատակենք, որ հակամարտության սկզբում Վլադիմիր Զելենսկին կոչ էր արել օտարերկրացիներին, ովքեր ռազմական փորձ ունեն, միանալ դիմադրությանը և օգնել ուկրաինացիներին պաշտպանվել։ Օտարերկրյա քաղաքացիներից, ովքեր ցանկություն են հայտնել միանալ Ուկրաինայի պաշտպանությանը, ստեղծվել է տարածքային պաշտպանության միջազգային լեգիոն։

Վետերաններն անգամ անգամ համեմատել են Ուկրաինայում ընթացող հակամարտությունը իրենց նախկինում մասնակցած ռազմական գործողությունների հետ։