Մոտ 500 տարի առաջ իտալացի նկարիչ և գիտնական Լեոնարդո դա Վինչին ստեղծեց մի գծագիր, որը, իր կարծիքով, արտահայտում էր կատարյալ համամասնություններով տղամարդու մարմին։ Այդ ուրվագիծն ամբողջ աշխարհում հայտնի դարձավ որպես «Վիտրուվյան մարդ» (Homo vitruvianus):

Դա Վինչիի այս նկարում արվեստի, մաթեմատիկայի և անատոմիայի միահյուսումը դարեր շարունակ հետաքրքրել է գիտնականներին։ Այժմ բրիտանացի մասնագետը հայտարարում է, որ բացահայտել է գաղտնիքը, թե ինչպես է դա Վինչին կատարյալ կերպով մարդկային կերպարանքը տեղադրել շրջանագծի և քառակուսու մեջ:

Գենետիկոս և փորձառու ատամնաբույժ Ռորի ՄըքՍվինին պնդում է, որ Վիտրուվյան մարդու գծագրի երկրաչափական կոդը վերծանելու բանալին նկարում «հավասարակողմ եռանկյան» օգտագործումն է, որը գտնվում է մարդու ոտքերի միջև:

Հետազոտողը նշում է, որ դա պատահական երկրաչափական ձև չէ, այլ արտացոլում է բնության մեջ հաճախ հանդիպող օրինաչափություն։ Լրացուցիչ վերլուծությունները ցույց են տվել, որ այս եռանկյունը համընկնում է Բոնվիլի եռանկյան հետ, որը ատամնաբուժության մեջ օգտագործվող երևակայական հավասարակողմ եռանկյունի է։ Այն արտահայտում է մարդու ծնոտի օպտիմալ կառուցվածքը:

ՄըքՍվինին նշում է, որ դա Վինչին դեռևս դարեր առաջ հասկացել է մարդու մարմնի իդեալական կառուցվածքը՝ շատ առաջ անցնելով իր ժամանակի գիտությունից:

Հիմնական գաղափարն այն է, որ երբ այս եռանկյունին օգտագործվում է գծագիրը կառուցելու համար, այն ստեղծում է կապ քառակուսու և շրջանագծի չափերի միջև։ Ըստ ՄըքՍվինիի, այդ հարաբերակցությունը կազմում է 1,64, որը գրեթե նույնական է 1,618 թվին, այսպես կոչված «ոսկե հարաբերակցությանը», որը լայնորեն տարածված է բնության մեջ:

Այս թիվը հանդիպում է նաև մարդու կատարյալ ծնոտի երկրաչափության, գանգի համամասնությունների, նույնիսկ ամենաամուր բյուրեղների ատոմային կառուցվածքների մեջ:

«Բոլորս բարդ պատասխան էինք փնտրում, մինչդեռ բանալին հենց Լեոնարդոյի խոսքերում էր։ Նա անընդհատ մատնանշում էր այդ եռանկյունին։ Ամենազարմանալին այն է, որ այս նկարը մարմնավորում է համընդհանուր օրենք։ Այն ցույց է տալիս, որ բնության կողմից օգտագործվող նույն «նախագիծը», որը ապահովում է արդյունավետ կառուցվածք, գործում է նաև իդեալական մարդու մարմնում»,— ասում է գիտնականը:

Լեոնարդո դա Վինչին իր նկարը ստեղծել է մոտ 1490 թվականին։ Այդ ժամանակ նա մասամբ ոգեշնչվել էր հռոմեացի ճարտարապետ Մարկոս Վիտրուվիոս Պոլլիոյի աշխատանքներով, ով պնդում էր, որ մարդու մարմինն ունի ներդաշնակ համամասնություններ։ Վիտրուվիոսը կարծում էր, որ մարդկային կերպարանքը կարող է կատարյալ տեղավորվել և՛ շրջանագծի, և՛ քառակուսու մեջ, սակայն երբեք չի ներկայացրել դրա մաթեմատիկական հիմքերը:

Իր հերթին, դա Վինչին, որը լուծել էր այդ խնդիրը, չի բացատրել, թե ինչպես է հասել այդ արդյունքին։ Վերջին հինգ դարերի ընթացքում գիտնականները առաջարկել են բազմաթիվ տեսություններ, սակայն դրանցից ոչ մեկը ճշգրիտ չի համապատասխանում իրական չափումներին: