**Մակրոնը չի բացառում նախագահի պաշտոնում կրկին առաջադրվելու հնարավորությունը**

Ֆրանսիայի նախագահ Էմանուել Մակրոնը հստակեցրել է, որ մտադիր է շարունակել ազդեցություն ունենալ երկրի քաղաքականության վրա նույնիսկ իր երկրորդ ժամկետի ավարտից հետո։ Նա չի բացառում Սահմանադրությամբ թույլատրվող նախագահական երրորդ ժամկետի հնարավորությունը՝ ապագայում կրկին առաջադրվելու դեպքում։

Վերջինս այդ մասին հայտարարել է կիրակի կայացած իր երիտասարդական շարժման 10-ամյակին նվիրված միջոցառման ժամանակ։ «Ես դեռ կարիք ունեմ ձեր աջակցությանը և ապավինում եմ ձեզ՝ ինչպես առաջիկա երկու տարիներին, այնպես էլ հինգ կամ տասը տարի հետո։ Դուք ինձ հետ կլինեք, և ես նույնպես ձեզ հետ կլինեմ», ասել է Մակրոնը։

Ֆրանսիայի Սահմանադրության համաձայն՝ Մակրոնը չի կարող 2027 թվականին երրորդ անընդմեջ ժամկետով առաջադրվել։ Սակայն այս սահմանափակումը վերաբերում է միայն հաջորդական ժամկետներին, ինչը նրան հնարավորություն է տալիս նախագահի պաշտոնում թեկնածություն ներկայացնել 2032 թվականին։

Չնայած նախագահը նախկինում հայտարարել էր, որ «դեռ չի մտածում» երրորդ ժամկետի մասին, պարզվել է, որ կառավարությունը հրամայել է հարցում կատարել՝ գնահատելու հասարակության արձագանքը նրա հնարավոր առաջադրմանը։ Խորհրդարանական տվյալներով՝ նման հարցումները սովորաբար կապված չեն լինում Ելիսեյան պալատի հետ, սակայն դրանց արդյունքները հաղորդվում են նախագահին։

Վերջին տվյալներով՝ Մակրոնի նկատմամբ վստահության մակարդակը Ֆրանսիայում գրանցում է պատմական նվազագույն։ Երկրի կառավարման հարցում նրան վստահում է ֆրանսիացիների միայն 22%-ը։

Անցյալ տարվա խորհրդարանական ընտրություններից հետո Մակրոնի քաղաքական ազդեցությունը նվազել է, քանի որ նրա կոալիցիան կորցրել է խորհրդարանի մեծամասնությունը, ինչը հանգեցրել է երկարատև քաղաքական ճգնաժամի։

Միաժամանակ, նախագահական ճամբարում արդեն սկսվել են հաջորդ ընտրությունների նախապատրաստական աշխատանքները։ Նախկին վարչապետ Գաբրիել Աթալը, ով ղեկավարում է Մակրոնի «Վերածնունդ» կուսակցությունը, հայտարարել է, որ մտադիր է մասնակցել 2027 թվականի նախագահական մրցավազքին։

Մակրոնն ինքը քննադատում է քաղաքական շրջանակների և լրատվամիջոցների՝ հաջորդ ընտրությունների վրա չափից ավելի կենտրոնանալու միտումը։ Նա կոչ է արել չկենտրոնանալ 2027 թվականի վրա, այլ շտապ լուծել երկրի ներկա խնդիրները։