Աջարիայի Ինքնավար Հանրապետության նախկին ղեկավար Թորնիկե Ռիժվաձեն կրծքավանդակի հրազենային վնասվածքով տեղափոխվել է Կախեթիի մարզի Սագարեջո քաղաքի «Geo Hospitals» կլինիկա։ Այս մասին տեղեկացրել է Վրաստանի Ներքին գործերի նախարարությունը։

Դեպքը հետաքննվում է Վրաստանի քրեական օրենսգրքի 115-րդ հոդվածի՝ «Ինքնասպանության դրդում» կետով։ Քննչական մարմիններն ակտիվորեն աշխատում են տվյալներ հավաքելու ու փաստեր հաստատելու ուղղությամբ։

Ներքին գործերի նախարարությունից հայտնել են, որ Ռիժվաձեն ստացել է շտապ բժշկական օգնություն։ Ըստ «Սպուտնիկ-Գրուզիայի»՝ նրա թոքերը վնասված են, իսկ առողջական վիճակը մնում է կայուն-ծանր։

Իրավապահ մարմինները կալանավորել են Վրաստանի ծովային տրանսպորտի գործակալության ղեկավար Ալեքսի Ախվլեդիանին՝ հրազենի անզգույշ պահպանման կապակցությամբ։

TV Pirveli-ի լրատվությամբ՝ Թորնիկե Ռիժվաձեն վերջին օրերն անցկացրել է Ալեքսի Ախվլեդիանիի մոր տանը։ Հուլիսի 7-ի գիշերը՝ ժամը մոտ 02:00-ին, այնտեղ լսվել են կրակոցներ։ Ներկայումս դեպքի վայրը հսկում է ոստիկանությունը։

«Փրայմ Թայմ»-ի վկայությամբ՝ Ռիժվաձեն իր ինքնասպանության փորձից առաջ թողել է գրություն, որը հայտնաբերել է բուժաշխատող անձնակազմը։ Թղթում նշված են մի շարք մեղադրանքներ, այդ թվում՝ կոռուպցիայի և ոչ առևտրային կազմակերպությունների հովանավորման հետ կապված հարցեր։ Ռիժվաձեն նամակում դիմել է իշխող «Վրացական երազանք» կուսակցության հիմնադիր Բիձինա Իվանիշվիլիին և վարչապետ Իրակլի Կոբախիձեին՝ խնդրելով իր ընտանիքի անվտանգությունն ապահովել։

Թորնիկե Ռիժվաձեն Աջարիայի կառավարության ղեկավարի պաշտոնից հրաժարական է տվել 2025 թվականի ապրիլի 4-ին։ Նա 2016 թվականի դեկտեմբերից ղեկավարել է Վրաստանի էներգետիկայի զարգացման հիմնադրամը և միաժամանակ ծառայել որպես երկրի էներգետիկայի փոխնախարար։

2014-2016 թվականներին նա եղել է Աջարիայի կառավարության տնտեսական խորհրդի խորհրդական։ 2013-2017 թվականներին աշխատել է «Աջարայի ջրեր» ընկերությունում՝ սկզբում որպես իրավական հարցերով խորհրդական, ապա՝ որպես տնօրեն։

Թորնիկե Ռիժվաձեն 36 տարեկան է։ Կրթությունն ստացել է Վրաստանում և արտասահմանում։ 2012-2013 թվականներին նա Մեծ Բրիտանիայի ԱԳՆ կրթաթոշակառու էր, այնուհետև ստացել է միջազգային գործարար իրավունքի մագիստրոսի աստիճան։

Նա ամուսնացած է և ունի երկու երեխա։