Առեղծվածային առևանգում Կոտայքի մարզում․ պարզվում են հանգամանքները

Երեկ՝ հուլիսի 5-ին, Կոտայքի մարզում օտարերկրացի տղամարդու առևանգում է տեղի ունեցել։ Ժամը 12:10-ին Կոտայքի մարզի ոստիկանությունը ստացել է տեղեկություն, որ Քաղսի գյուղի հյուրատանց մեկից մարդ է առևանգվել։

Իրավապահներն անմիջապես ժամանել են դեպքի վայր։ Ոստիկանական խումբն աշխատանքներ է սկսել Կոտայքի մարզի քրեական վարչության պետ Արթուր Զաքարյանի ղեկավարությամբ։ Նրան միացել են նաև պարեկային ծառայության աշխատակիցներ՝ գումարտակի հրամանատար Լևոն Բադալյանի գլխավորությամբ։

Քննչական կոմիտեի Կոտայքի մարզային վարչությունից դեպքի վայր է ժամանել քննչական խումբ՝ Հովհաննես Չալաբյանի գլխավորությամբ։ ժամանել են նաև փորձաքրեագետներ։

Նախնական տվյալներով՝ անհայտ անձինք ավտոմեքենայով առևանգել են օտարերկրացի մի տղամարդու։ Իրավապահները սկսել են նրա որոնումները, իսկ քննչական մարմինները բացել են քրեական գործ՝ «սպանություն» հատկանիշներով:

Ֆոտոլրագրող Գագիկ Շամշյանի տեղեկությամբ, կա կասկած, որ տուժածը կարող էր սպանվել, որից հետո մարմինը փորձել են թաքցնել։ Ոստիկանությունն ունի նաև տվյալներ առևանգման ենթադրյալ մասնակցի մասին, որը նույնպես օտարերկրացի է։ Համաձայն տեղեկությունների՝ կասկածյալը և տուժածը մի քանի օր Քաղսի գյուղի հյուրատանը բնակվել են:

Նախաքննությունը շարունակվում է։ Լրացուցիչ մանրամասներ չեն հրապարակվում քննչական գործողությունների շահերը հաշվի առնելով։

Հիշեցնում ենք, որ ՀՀ օրենսդրությամբ կասկածյալը համարվում է անմեղ, քանի դեռ նրա մեղավորությունը չի ապացուցվել դատարանի վճռով։