Փաստաբան Արամ Վարդևանյանը մեկնաբանել է Գլխավոր դատախազ Աննա Վարդապետյանի՝ Սամվել Կարապետյանի գործով արձանագրած դիրքորոշումը։

Վարդևանյանի խոսքով՝ Գլխավոր դատախազն անդրադարձել է Կարապետյանի գործով իր կողմից հաղորդում տալու հանգամանքին։ Փաստաբանը նշում է, որ քանի որ հենց ինքն է հրապարակել այդ մասին, Վարդապետյանի ակնարկը վերաբերում է իրեն։

Նա նշել է, որ Գլխավոր դատախազի մոտից հաստատում է լսել, այլ ոչ թե հերքում, սակայն կարևորում է հետևյալ կետերը․

1) Դատարանին ներկայացված կալանքի միջնորդության մեջ ուղղակիորեն նշված է․ «ՀՀ գլխավոր դատախազի՝ 2025 թվականի հունիսի 17-ի առերևույթ հանցանքի մասին պատշաճ հաղորդումը»։

2) Դատարանի որոշման մեջ բառացի նշված է․ «մասնավորապես՝ ՀՀ գլխավոր դատախազի՝ 2025 թվականի հունիսի 17-ի առերևույթ հանցանքի մասին հաղորդմամբ»։ Փաստաբանը նշում է, որ քննիչը ընդգծել է «պատշաճ» բառը, իսկ դատարանը հրաժարվել է դրա օգտագործումից։

Վարդևանյանը կարծում է, որ Սամվել Կարապետյանի գործի իրավական աբսուրդի սկիզբը դրվել է հենց Գլխավոր դատախազի կողմից, ինչը, ըստ նրա, քաղաքական հետապնդման ապացույց է։ Նա նաև նշել է, որ միջին ծանրության հանցանքի կասկածյալի՝ նախկինում անբասիր համբավ ունեցող Կարապետյանին կալանավորելու որոշումը քննարկման չի ենթարկվել։