Պոլսի հայոց պատրիարք Սահակ Մաշալյանը ԱՄՆ կատարած այցից հետո Ստամբուլում մամուլի ասուլիս է անցկացրել։ Հիմնական քննարկման թեմաներն են եղել պատրիարքի ԱՄՆ ուղևորությունը, պատրիարքարանի փակումը Հայաստանի վարչապետ Նիկոլ Փաշինյանի Ստամբուլ այցի ժամանակ, ինչպես նաև թուրքահայ համայնքի արձագանքները։

Հայաստանի վարչապետ Նիկոլ Փաշինյանի՝ Ստամբուլ կատարած այցի ժամանակ տեղի հայ համայնքի հետ հանդիպմանը պատրիարքարանը հոգևոր ներկայացուցիչ չի ունեցել, իսկ պատրիարքարանի շենքը փակ է եղել։

Պատրիարք Սահակ Մաշալյանը նշել է, որ Հայաստանի կողմից արարողակարգային սխալ է թույլ տրվել, իսկ վարչապետ Փաշինյանի՝ պատրիարքարան այցելելու պաշտոնական խնդրանքը գրավոր չի ներկայացվել։

Մաշալյանը բացատրել է, որ Հայաստանի Հանրապետությունը և Պոլսո հայոց պատրիարքարանը առանձին հաստատություններ են՝ տարբեր պատմական ավանդույթներով։ Նա հիշատակել է, որ նախկինում պատրիարքարանում հյուրընկալվել է Հայաստանի առաջին նախագահ Լևոն Տեր-Պետրոսյանը, սակայն այս դեպքում պաշտոնական հրավեր չի եղել։

Պատրիարքը մեկնաբանել է նաև վարչապետի կողմից Գումգափըի Աստվածածին եկեղեցի այցելելու դեպքը՝ նշելով, որ հոգևորականի բացակայությունը կապված է եղել Փաշինյանի՝ Ամենայն հայոց կաթողիկոս Գարեգին Բ-ի նկատմամբ վիրավորական արտահայտությունների հետ։

Մաշալյանը նշել է, որ Կիլիկիայի կաթողիկոս Արամ Ա-ն և Երուսաղեմի պատրիարք Նուրհան Մանուկյանը նույնպես աջակցել են Էջմիածնի դիրքորոշմանը։ Պատրիարքը պարզաբանել է, որ իրականացրել է «լուռ բողոքի ակցիա», որն ընկալվել է վարչապետի կողմից։

Անդրադառնալով կաթողիկոսի ընտրության վերաբերյալ լուրերին՝ Մաշալյանը հերքել է իր թեկնածությունը՝ ընդգծելով եկեղեցու ավանդույթներն ու կարգապահությունը։

Որպես եզրափակում պատրիարքը նշել է, որ թուրքահայ համայնքը աջակցում է Հայաստան-Թուրքիա հարաբերությունների բարելավմանը, սակայն չի կարող անտեսել եկեղեցու նկատմամբ քաղաքականացված մոտեցումները։