Բաքվի դատարանը «Россия сегодня» («Sputnik Азербайджան») լրատվական գործակալության Բաքվի մասնաճյուղի գործադիր տնօրեն Իգոր Կարտավիխին և գլխավոր խմբագիր Եվգենի Բելոուսովին չորս ամսվա կալանքի է ենթարկել։ Այս մասին տեղեկացրել է APA լրատվական գործակալությունը։

Ինչպես նախկինում հաղորդել էր РИА Новости-ն, արդեն երկրորդ օրն է, որ ո՛չ ձերբակալվածների հարազատներին, ո՛չ Ռուսաստանի դիվանագիտական ներկայացուցիչներին հնարավորություն չի տրվում նրանց հետ հանդիպելու։

Ձերբակալությունները տեղի են ունեցել հունիսի 30-ին։ Ադրբեջանի իրավապահները ձերբակալել են «Սպուտնիկ Ազերբայջան»-ի յոթ աշխատակիցների, այդ թվում՝ գործադիր տնօրեն Իգոր Կարտավիխին և գլխավոր խմբագիր Եվգենի Բելոուսովին։ Որոշ ժամանակ անց Ադրբեջանի ՆԳՆ քրեական գործ է հարուցել խարդախության, անօրինական բիզնես գործունեության և փողերի լվացման կասկածանքով։

«Россия сегодня» մեդիաընկերությունը պահանջել է անմիջապես ազատ արձակել իր աշխատակիցներին։ Ռուսաստանի ԱԳ նախարարությունը Բաքվի քայլերը բնութագրել է որպես «ոչ բարեկամական», իսկ ձերբակալությունները՝ «անօրինական»։ Մոսկվա է հրավիրվել Ադրբեջանի դեսպան Ռահման Մուստաֆաևը, ում ներկայացվել է բանավոր բողոք՝ ռուս լրագրողների ազատ արձակման պահանջով։