**«Մայր Աթոռ Սուրբ Էջմիածինը մտահոգություն է հայտնել Տ. Բագրատ արքեպիսկոպոս Գալստանյանի գործի կապակցությամբ»**

«Մայր Աթոռ Սուրբ Էջմիածինը խոր մտահոգություն է արտահայտել Տ. Բագրատ արքեպիսկոպոս Գալստանյանի և նրա համախոհների նկատմամբ իրավապահ մարմինների ձեռնարկած գործողությունների, ինչպես նաև նրանց դեմ առաջադրված ծանր մեղադրանքների կապակցությամբ»։ Այս մասին տեղեկացնում է Գերագույն հոգևոր խորհրդի տարածած հայտարարությունը։

Խորհրդի կարծիքով, «իրավական գործընթացի նկատմամբ վստահություն չի ներշնչում այն փաստը, որ դեռևս գործի քննության սկզբնական փուլում Հայաստանի վարչապետը և իշխող կուսակցության ներկայացուցիչները քաղաքական մոտիվներով հրապարակումների միջոցով փորձել են ազդել իրավապահների գործողությունների վրա»։

«Նույնքան անընդունելի է այս գործընթացը Եկեղեցու հետ կապելու և Մայր Աթոռի վարկաբեկմանն առնչվող փորձերը։ Այս քայլերը համահունչ են իշխանությունների կողմից վերջին ժամանակներում հակաեկեղեցական տրամադրություններ սերմանելու տենդենցին»,– նշվում է հայտարարության մեջ։

Մայր Աթոռը հայտարարել է, որ կօգտագործի իրավական բոլոր միջոցները՝ ապահովելու գործի արդար վարքը։ Նաև հորդորել է համապատասխան մարմիններին խուսափել քաղաքական շահարկումներից և գործել օրենքին ու Սահմանադրությանը համապատասխան՝ պահպանելով անմեղության կանխավարկածի սկզբունքը։