Մերձավոր Արևելքում լարվածության սրացումը սպառնալիք է ներկայացնում ոչ միայն տարածաշրջանային, այլև Հարավային Կովկասի անվտանգության համար։ Այս մասին Եվրոպայի Խորհրդի Պառլամենտական վեհաժողովի (ԵԽՎ) նիստում Հայաստանի Ազգային Ժողովի պատվիրակության անդամ Արմեն Գևորգյանը հայտարարեց՝ «Համաշխարհային խաղաղությունը՝ վտանգված. Գազայում մարդասիրական աղետի դադարեցումը և Մերձավոր Արևելքում լայնածավալ հակամարտության լուծումը» թեմատիկայով քննարկման ժամանակ։

Ըստ նրա՝ «Վերջին 5 տարիներում Հայաստանը ականատես է եղել միջազգային կարգերի փոփոխությունների. ինստիտուտները կորցնում են ազդեցությունը, նորմերը՝ արդիականությունը, իսկ պետական սահմանները՝ կայունությունը։ Այսպիսի պայմաններում յուրաքանչյուր երկիր ստիպված է մշակել սեփական գոյատևման ռազմավարությունը»։

Գևորգյանը նշել է, որ Մերձավոր Արևելքի իրադարձությունները ցույց են տալիս գործընկերության և փոխըմբռնման կարևորությունը, սակայն Հայաստանի համար դրանք մնում են մարտահրավեր։ «Արժեքներին առնչված հարցերում մենք եվրոպամետ ենք, բայց հակամարտությունների լուծման հարցում դառնում ենք Մերձավոր Արևելքի մաս, որտեղ գործում են այլ կանոններ։ Լավատեսությունը չի կարող վերացնել առկա ռիսկերը»։

Նա քննադատաբար է խոսել Իսլամական համագործակցության կազմակերպության կողմից ընդունված բանաձևի մասին, որն, ըստ նրա, «կրոնը զենք է դարձնում Հայաստանի մշակութային ժառանգության և քրիստոնեական ինքնության դեմ»։ Ընդհանուր առմամբ, Գևորգյանը նշել է, որ Եվրոպայի Խորհուրդը պահպանում է «դիվանագիտական լռություն» հայ-ադրբեջանական հարաբերություններում՝ խուսափելով հստակ դիրքորոշումից։ Միաժամանակ, կոչ է արել Եվրոպային չսահմանափակել Հայաստանի՝ ավանդական դաշնակիցների հետ կապերի զարգացումը, քանի որ դա կարող է հանգեցնել նոր ագրեսիայի։