Հունիսի 5-ին կայացած կառավարության նիստում վարչապետ Նիկոլ Փաշինյանը Նոր կտակարանից մեջբերում կատարեց՝ ընդգծելով իրավական և բարոյական պատասխանատվության համընդհանուրությունը.
«Մի դատիր, որ չդատվես, որովհետև ինչ դատով դատես, նույն դատով էլ դատվելու ես»։

Փաշինյանի խոսքով՝ սա սկզբունք է, որ վերաբերում է ոչ միայն ուրիշներին դատելուն, այլև սեփական գործելակերպին․
«Մեզ համար սա նշանակում է, որ եթե մենք ինչ-որ մեկին մեղադրում ենք ապօրինի գույք ձեռք բերելու մեջ և այն վերադարձնում ենք պետությանը, ապա նույն չափանիշներով մեզ պետք է գնահատեն։ Այս մոտեցումը կիրառվել է նաև մեր իշխանության շրջանում։»

Վարչապետը շեշտեց, որ իրենք չեն կարող նույն մեթոդներով վերցնել գույքը և այն փոխանցել իրենց հարազատներին․
«Չենք կարող մանկապարտեզը նախկին պաշտոնյայի կնոջից վերցնել ու տալ մեր կնոջը կամ երեխային։ Դա նույն անօրինական ճանապարհով վարվել կլինի։»

Փաշինյանը հավելեց, որ իրենց նպատակը երբեք չի եղել պարզապես վերցնել և հարստանալ՝
«Եթե մեր նպատակը լիներ հնարավոր ամեն ինչից վերցնելը, այդքան չէինք չարչարվի, օրենքներ չէինք փոխի, նոր դատարաններ չէինք ստեղծի։ Մեր նպատակն է կառուցել իրավական երկիր։»

Վարչապետը կրկին ընդգծեց իշխանության որդեգրած մոտեցումը՝
«Մերոնք–ձերոնք չկա, կա օրինական և ապօրինի գույք։ Մնացածը շահարկում է, և հասարակությունը պետք է հասկանա՝ մեր քայլերի նպատակը վերականգնել արդարությունը է, ոչ թե վրեժխնդրություն»։