Մարմարաշենի սբ. Գևորգ եկեղեցու հոգևոր հովիվ Տեր Ղազար Թորոսյանը արձագանքել է Երևանի ավագանու «Հանրապետություն» խմբակցության անդամ Անի Խաչատրյանի վերջերս արված հայտարարություններին։

Քահանան իր գրառման մեջ նշել է, որ Խաչատրյանը լրագրողների հետ զրույցում անհիմն և վիրավորական մեկնաբանություններ է արել Հայ Առաքելական Եկեղեցու ներկայացուցիչների և Ամենայն Հայոց Կաթողիկոսի հասցեին։ Նրա խոսքերն անվանել է փաստերի աղավաղում և անպատասխանատու վերաբերմունք։

Տեր Ղազարը հարց է տվել, թե ինչու է Երևանի ավագանու անդամը, համայնքային խնդիրներով զբաղվելու փոխարեն, օգտագործում իր պաշտոնական դիրքը՝ եկեղեցու դեմ անհիմն մեղադրանքներ ներկայացնելու համար։ Նա նշել է, որ լրագրողների հարցերին Խաչատրյանը չի կարողացել տրամաբանական պատասխաններ տալ, ինչը ցույց է տալիս նրա հայտարարությունների անհիմն լինելը։

«Տերտերները բիզնեսմեններ են» արտահայտությունը քահանան անվանել է ոչ միայն սխալ, այլև անպատշաճ։ Նա նշել է, որ նման ընդհանրացումները վիրավորական են ինչպես հավատացյալների, այնպես էլ հոգևորականների համար։

Խաչատրյանը նշել է, որ եկեղեցի է հաճախում, սակայն չի ընդունում Կաթողիկոսին։ Տեր Ղազարը պատասխանել է, որ քրիստոնեական հավատքի տրամաբանությամբ անհնար է լինել Եկեղեցու մաս՝ մերժելով նրա ղեկավարությունը։ Մոմ վառելը բարեպաշտական սովորություն է, սակայն հավատքը դրանով չի սահմանափակվում։

Քահանան հույս է հայտնել, որ Խաչատրյանի շրջապատում կլինեն խոհեմ մարդիկ, ովքեր կօգնեն նրան ավելի խորը ուսումնասիրել եկեղեցու պատմությունն ու դերը՝ նախքան հրապարակային քննարկումներում մասնակցելը։

Նա նաև դիմել է լրագրողներին՝ կոչ անելով ավելի պատասխանատու մոտենալ ազգային և հոգևոր արժեքներին վերաբերող թեմաներին։ Տեր Ղազարը նշել է, որ նման հարցերում կարևոր է հնարավորություն տալ կոմպետենտ և հավասարակշիռ կարծիքներ արտահայտող մասնագետներին՝ խուսափելու սխալ տեղեկատվության տարածումից։