Իրանի միջուկային ծրագիրը. ոչնչացվե՞լ է, թե՞ իսկապես թաքցված է

Իսրայելի և ԱՄՆ-ի հարվածների արդյունավետության գնահատման ֆոնին անպատասխան է մնում մի կարևոր հարց. արդյոք Իրանի միջուկային ծրագիրը լիովին ոչնչացվել է, թե՞ ուրանի պաշարները պարզապես տեղափոխվել են ավելի գաղտնի և դժվար հայտնաբերվող վայրեր։

Հարցի պատասխանը մեծապես կախված է 408 կգ բարձր հարստացված ուրանի ճակատագրից, որը մոտ է միջուկային զենք արտադրելու համար անհրաժեշտ մակարդակին։

ԱՄՆ պետքարտուղար Մարկո Ռուբիոն խոստովանել է, որ «ոչ ոք մի քանի օր չի իմանա», արդյոք Իրանը փորձել է տեղափոխել ուրանի պաշարները։ Սակայն նա նշել է, որ կասկածում է տեղափոխման հնարավորությանը՝ նշելով, որ «հենց որ բեռնատարը շարժվի, Իսրայելը կտեսնի, թիրախավորի և կոչնչացնի այն»։

Միևնույն ժամանակ, Իրանի ռեժիմի հետ կապեր ունեցող աղբյուրներ հայտնել են, որ «շատ միամիտ կլինի հարստացված ուրանը պահել այնպիսի վայրերում, ինչպիսիք են Ֆորդոն, Սպահանը և Նեթանզը»՝ հաստատելով, որ «ուրանը վնասված չէ»։

Մոսադի նախկին մասնագետ Սիմա Շայնը վստահ է, որ Իրանը հարստացված ուրանը տեղափոխել է այլ վայրեր։ Նրա խոսքով՝ «նրանք ունեն բավարար քանակությամբ հարստացված ուրան և տեղափոխել են առաջադեմ ցենտրիֆուգներ՝ միջուկային սարք ստեղծելու նպատակով»։ Նա հավելել է, որ «ծրագիրը լիովին չի ոչնչացվել՝ անկախ ԱՄՆ-ի հայտարարություններից»։

Իսրայելի պաշտոնյաներից մեկը նշել է, որ Թեհրանը, հավանաբար, տեղափոխել է իր միջուկային պաշարների մի մասը։ Սակայն նա նշել է, որ Իսրայելի կողմից 11 իրանցի միջուկային գիտնականների սպանությունից հետո ռեժիմը կանգնած կլինի խոչընդոտների առաջ «արդյունավետ, մանրաչափ միջուկային զենք» ստեղծելու ճանապարհին։