Հայաստանի գիտությունների ազգային ակադեմիայում գիտական հանրությունը հանդիսավոր նշում է Գիտության միջազգային օրը՝ նշանաբանով «Հանուն խաղաղության և զարգացման»:

Միջոցառմանը ներկա գտնվեցին Կրթության, գիտության, մշակույթի և սպորտի նախարար Ժաննա Անդրեասյանը, Գիտությունների ազգային ակադեմիայի նախագահ Աշոտ Սաղյանը, Ազգային ժողովի գիտության, կրթության, մշակույթի և սպորտի հարցերի մշտական հանձնաժողովի նախագահ Սիսակ Գաբրիելյանը, ինչպես նաև գիտնականներ:

ԿԳՄՍ նախարար Ժաննա Անդրեասյանը, շնորհավորելով ներկաներին, ընդգծեց, որ այս օրը խորհրդանշական է Գիտությունների ազգային ակադեմիայի հիմնադրման օրվա հետ լինելու կապակցությամբ։ «Այսօր չափազանց կարևոր է խոսել գիտության հանրային նշանակության և ազդեցության մասին։ Պետության կարիքների և գիտական արդյունքների համապատասխանեցում, ինչպես նաև անհրաժեշտ գործիքակազմերի առկայություն՝ սա էլ է պահանջում։ Գիտությունը միշտ ցույց է տալիս զարգանալու ուղիները, և կան բազմաթիվ անելիքներ այդ ուղղությամբ»,- նշեց նախարարը։ Նա շնորհակալություն հայտնեց ակադեմիային իր ակտիվ գործունեության համար և արժևորեց գիտական համայնքի բարձր մասնակցությունը տարբեր մրցույթներին:

Ժաննա Անդրեասյանը հավելեց, որ առավելագույն ուշադրություն պետք է տալ երիտասարդներին դեպի գիտություն ուղղորդելու, գիտնականի կարիերան գրավիչ և մրցունակ դարձնելու և գիտական արդյունքները հանրային լայն լսարանին ներկայացնելու համար:

Նա ընդգծեց Գիտությունների ազգային ակադեմիայի դերը «Բարձրագույն կրթության և գիտության մասին» օրենքի շուրջ կատարվող նորարարությունների գործընթացում՝ նշելով, որ ակադեմիայի զարգացումը նոր շրջափուլ է մտնում՝ ուղղված թե՛ գիտության, թե՛ պետության զարգացմանը:

Նախարարի խոսքով՝ կարևոր է գիտության միջազգայնացման ուղղությամբ տարվող աշխատանքները և հայերեն լեզվով գիտության զարգացումը շարունական դարձնել։ «Մեր ամսագրերի տարածումը միջազգային հիմնադրամներում ռազմավարական նշանակություն ունի։ Կարևոր է հայերեն լեզվով գիտությունը խրախուսել, որպեսզի տարբեր երկրների գիտնականներ կարողանան տպագրվել ինչպես հայերեն, այնպես էլ միջազգային ամսագրերում։ Այս ուղղությամբ քննարկվում են հավելյալ ծրագրեր և աջակցության մեխանիզմներ ներդնելու հնարավորությունները»,- հավելեց Ժաննա Անդրեասյանը:

Նա նաև հիշատակեց Հայագիտական կոնգրեսի մասին, որը տեղի ունեցավ Մատենադարանում, միավորելով տարբեր երկրների հայագիտական առաջատար կենտրոնները։ Նա նշեց, որ նպատակ կա ունենալ հայագիտության զարգացման առանձին հայեցակարգային փաստաթուղթ:

Ժաննա Անդրեասյանը անդրադարձավ 2026-2030 թվականների գիտության զարգացման ռազմավարությանը, ինչը կնախանշի ճիշտ քայլեր՝ նպաստավոր գիտություն ստեղծելու համար:

ԳԱԱ նախագահ Աշոտ Սաղյանը, իր հերթին՝ ողջունելով մասնակիցներին, ընդգծեց գիտության նշանակությունը մեր առօրյայում՝ խրախուսելով նորարարություններին, բարձր տեխնոլոգիաներին և արհեստական բանականություններին միտված քայլերը. «Մենք ապրում ենք գիտության հրաշքների դարաշրջանում։ Սակայն, ասում է Աշոտ Սաղյանը, աշխարհը, ինչպես նաև մեր հասարակությունը, կանգնած են գիտության նկատմամբ վստահության ճգնաժամի առաջ։ Այսօր ընթանում է Հայաստանի գիտության զարգացման ռազմավարության խորքային վերանայում, ինչպես նաև Գիտությունների ազգային ակադեմիայի կարգավիճակի ներկայիս փոփոխությունների գործընթաց։ Նախագահը ստորագրել է «Բարձրագույն կրթության և գիտության մասին» նոր օրենքը, որը ակադեմիային դարձնում է հիմնադրամ՝ ոչ առևտրային կազմակերպության փոխարեն»:

Այս փոփոխության արդյունքում ակադեմիան վերածվում է գիտամեթոդական և փորձագիտական կենտրոնի, որի առաքելությունը կլինի գիտահետազոտական ինստիտուտների և կենտրոնների գործունեության մշտադիտարկումն ու արդյունավետության գնահատումը։ Բացի այդ, ակադեմիան զբաղվելու է գիտության ոլորտի ընդհանուր քաղաքականության ձևավորմամբ, առաջարկություններ ներկայացնելով Կառավարությանը և զբաղվելով հրատարակչական գործունեությամբ:

Միջոցառման շրջանակում տեղի ունեցավ ԳԱԱ 2025 թ․ մրցույթի հաղթողների պարգևատրման արարողությունը, ինչպես նաև Վիկտոր Համբարձումյանի անվան միջազգային գիտական մրցանակի մրցույթի հավաստագրերի հանձնումը: «Գիտության աշխարհում» հանդեսի 20-ամյակի առթիվ շնորհակալագրեր հանձնվեցին առավել ակտիվ հեղինակներին:

Արարողության ընթացքում ներկայացվեցին գիտական զեկուցումներ, որ ներկայացնում էին ինչպես տեղական, այնպես էլ միջազգային գիտնականներ։