Հայաստանում կենսաթոշակների նշանակման ընթացակարգերում սպասվում են փոփոխություններ, որոնք միտված են այս գործընթացի դյուրացմանը։ Նախատեսված է պարզեցնել թե՛ աշխատանքային ստաժի, թե՛ պահանջվող փաստաթղթերի հետ կապված ընթացակարգերը։ Այս մասին այսօր՝ նոյեմբերի 7-ին, մամուլի ասուլիսում հայտարարեց ՀՀ աշխատանքի և սոցիալական հարցերի նախարարության կենսաթոշակային ապահովության և այլ դրամական վճարների վարչության պետ Անահիտ Գալստյանը։

Նա ընդգծեց, որ 1992-2004 թվականներն արագացնող խնդիր են առաջացրել կենսաթոշակի հաշվարկման հարցում։ Շատ քաղաքացիների համար այդ տարիների աշխատանքային գործունեության վերաբերյալ փաստաթղթերը լիարժեք չեն պահպանվել, ինչը ստիպում էր դիմել բարդ գործընթացի։ Փաստաթղթերի բացակայության պատճառով որոշ տարիների ստաժը չէր հաշվարկվում։

«1992-2004 թվականների շրջանն իսկապես սուր խնդիր է մեզ համար, քանի որ փաստաթղթերը կամ ամբողջությամբ չպահպանվել են կամ մասամբ են պահպանվել։ Մենք այժմ փորձում ենք վերանայել գործընթացը՝ այն դյուրացնող լուծումներով։ Նախկինում ստաժի հաշվարկման համար պահանջվում էր ոչ միայն աշխատանքային գրքույկ, այլև սոցիալական վճարի կամ աշխատավարձի ստացման վկայություններ։ Այսինքն՝ միայն աշխատանքի գրքույկը քիչ էր ստաժի հաշվարկման համար։

Ի՞նչ ենք առաջարկում այժմ։ Մշակվել է հատուկ ցանկ, որում ընդգրկված են կազմակերպություններ, որտեղ 1992-2004 թվականներին աշխատած անձանց ստաժը կհաշվարկվի, եթե առկա լինի միայն աշխատանքային գրքույկը։ Այսինքն՝ այսուհետ աշխատանքային գրքույկը բավարար կլինի ստաժի համար»,- նշեց Անահիտ Գալստյանը։

Հատուկ ցանկում ներառվել են պետական կառույցներ, բանկեր, ֆինանսական այլ կազմակերպություններ, դպրոցներ, բուհեր, բուժհաստատություններ, ինչպես նաև մշակութային կառույցներ, ինչպիսին են թատրոնները, կինոթատրոնները և այլն։ Ցանկն հասանելի կլինի ՀՀ աշխատանքի և սոցիալական հարցերի նախարարության պաշտոնական կայքում։