Իրանի նախագահ Մասուդ Փեզեշքիանը, Ատոմային էներգիայի կազմակերպության այցի ժամանակ, հայտնեց, որ երկիրը պատրաստվում է վերականգնել այն միջուկային օբյեկտներն ու կայանները, որոնք վնասվել են իսրայելական և ամերիկյան զորքերի կողմից, փոխանցում է Mehr։

«Մեր միջուկային շինությունները կամ կայանները ոչնչացնելը մեզ չի կարող կանգնեցնել։ Մենք վերականգնվելու ենք՝ դարձնելով մեզ առավել ուժեղ և վճռական, քան երբևէ», — հայտարարեց Փեզեշքիանը՝ այցելելով իրանցի գիտնականների նվաճումների ցուցահանդեսը։

Նա հանդիպեց նաև կազմակերպության բարձրաստիճան պաշտոնյաներին և հարգանքի տուրք մատուցեց 12-օրյա պատերազմի ընթացքում զոհվածների և իրանցի միջուկային գիտնականների հիշատակին՝ նրանց աշխատանքը բնութագրելով որպես «գիտական ջիհադ և ազնիվ ծառայություն»։

Փեզեշքիանը ընդգծել է, որ իրանցի գիտնականների դեմ թշնամանքի և սպանությունների պատճառը Իրանի գիտատեխնիկական անկախության հանդեպ մեծ տերությունների անհանգստությունն է։

Նա նշեց, որ Իրանը բազմիցս հայտարարել է՝ միջուկային զենքի ստեղծումը իր նպատակների մեջ չի մտնում, և որ համաշխարհային տերությունները լավ տեղեկացված են այդ փաստի մասին։

«Այդուհանդերձ, — հավելել է նա, — նրանք օգտագործում են այդ կեղծ պնդումը որպես խոչընդոտ, որպեսզի դանդաղեցնեն Իրանի առաջընթացը»։