Հոկտեմբերի 4-ին և 5-ին Ծաղկաձորում տեղի ունեցավ երկօրյա քննարկում «Ատելության խոսքի վերաբերյալ իրազեկվածության բարձրացում» թեմայով, որը կազմակերպվել էր ՀՀ մարդու իրավունքների պաշտպանի և Կոնրադ Ադենաուեր հիմնադրամի համագործակցությամբ:

Հանդիպման ընթացքում քննարկվեցին ատելության խոսքի տարածման մարտահրավերները, մասնավորապես՝ սոցիալական մեդիայի միջոցով տարածվող ատելության դրսևորումները, դրանց պատճառները, ինչպես նաև պայքարի միջազգային չափանիշները և առավել հաճախ թիրախավորվող խմբերը: Ներկա էին Ազգային ժողովի պատգամավորներ, դատական իշխանության, դատախազության, Հեռուստատեսության և ռադիոյի հանձնաժողովի, ինչպես նաև Մարդու իրավունքների պաշտպանի աշխատակազմի ներկայացուցիչներ:

Մարդու իրավունքների պաշտպան Անահիտ Մանասյանը անդրադարձավ ատելության խոսքի կանխարգելման համար անհրաժեշտ հետևողական աշխատանքին՝ նշելով, որ այդ խոսքի տարածումը խափանում է հասարակության համերաշխությունը և վտանգում ժողովրդավարական արժեքների ամրապնդումը։

«Հայաստանում ատելության խոսքն ունի մտահոգիչ ծավալներ և գրեթե ամենօրյա ռեժիմով է գործածվում։ Այն տարածվում է ինչպես մասնագիտական և ակադեմիական հանրությունների, այնպես էլ հանրային և քաղաքական ֆիգուրների կողմից՝ ներկայացնելով վտանգավոր միտում՝ որը կարող է թունավորել հասարակության հիմքերը։ Դրա դեմ պայքարը պահանջում է համատեղ, սոլիդար և հետևողական ջանքեր։ Ազգային ժողովն ու քաղաքական գործիչները ամուր պատասխանատվություն ունեն՝ ատելության խոսքինդեմ արդյունավետ ռազմավարությունների մշակման հարցում։ Ամբողջությամբ ընկալելու էականությունը պարտադիր է, քանի որ ատելության խոսքը պետք է կանխվի բոլոր հանգամանքներում»,- ընդգծեց Անահիտ Մանասյանը։

Մանասյանն առանձնացրեց նաև մեդիայի դերը՝ շեշտելով, որ այդ միջավայրը չպետք է նպաստի ատելության խոսքի տարածմանը, այլ՝ հասարակության իրազեկումը բարձրացնի և ամրապնդի հասարակական համերաշխությունը։

Բացման խոսքով հանդես էին եկել նաև Կոնրադ Ադենաուեր հիմնադրամի Քաղաքական երկխոսություն Հարավային Կովկաս ծրագրի ղեկավար Յակոբ Վյոլենշտայնը և ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահի պաշտոնակատար Ռուստամ Բաքոյանը:

Քննարկման ընթացքում ներկայացվեցին միջազգային փորձը, իրավական մոտեցումները և մեդիայի պատասխանատվության հարցերը։ Կարևորվեցին նաև խմբային աշխատանքները և պանելային քննարկումները, որտեղ մասնակիցները փորձեցին մշակել արդյունավետ մեխանիզմներ ատելության խոսքի դեմ պայքարի և իրազեկման բարձրացման ուղղությամբ։

Միջոցառումն անցավ ազգային փորձագետ Արա Ղազարյանի և միջազգային փորձագետ, իրավապաշտպան Ադնան Կադրիբաշիչի գլխավորությամբ։ Մարդու իրավունքների պաշտպան Անահիտ Մանասյանը, Ազգային ժողովի պատգամավորները, ՀՀ վերաքննիչ քրեական դատարանի դատավոր Արսեն Նիկողոսյանը, Հեռուստատեսության և ռադիոյի հանձնաժողովի անդամ Գոհար Մամիկոնյանը և Գլխավոր դատախազության ներկայացուցիչ Հայկ Հովհաննիսյանը խոսեցին տարբեր դերակատարների իրավասությունների և համագործակցության մասին։