Հայաստանի Հանրապետության գիտությունների ազգային ակադեմիայի (ՀՀ ԳԱԱ) նախագահության որոշմամբ, Հունաստանից Սալոնիկի Արիստոտելի համալսարանի դեղագիտության ֆակուլտետի պրոֆեսոր, քիմիական գիտությունների դոկտոր Աթինա Գերոնիկակիին շնորհվել է ՀՀ ԳԱԱ պատվավոր դոկտորի կոչում։ Պրոֆեսոր Գերոնիկակին նշանակալի ներդրում է ունեցել ՀՀ ԳԱԱ Օրգանական և դեղագործական քիմիայի գիտատեխնոլոգիական կենտրոնի գիտական գործունեության զարգացման գործում։

Պրոֆեսոր Գերոնիկակիի գիտական հետաքրքրությունների շրջանակում են նոր կենսաբանորեն ակտիվ հետերոցիկլիկ միացությունների (հակաբակտերիալ, հակասնկային, հակաքաղցկեղային, հակավիրուսային, հակաբորբոքային) նախագծումը, սինթեզը և կենսաբանական հատկությունների ուսումնասիրումը:

Պրոֆեսոր Գերոնիկակիի և ՀՀ ԳԱԱ Օրգանական և դեղագործական քիմիայի գիտատեխնոլոգիական կենտրոնի համագործակցությունը սկսվել է 2011 թվականից։ Նրա գիտական խումբը Կենտրոնի Նուրբ օրգանական քիմիայի ինստիտուտի № 6 լաբորատորիայում իրականացրել է սինթեզված միացությունների մի շարք կենսաբանական հետազոտություններ։ Պրոֆեսորը մասնակցել է հոդվածների ձևակերպմանը և խմբագրմանը՝ ապահովելով դրանց համապատասխանությունը միջազգային չափանիշներին։ Նրանց առաջին համատեղ աշխատանքը հրապարակվել է 2013 թվականին «Tetrahedron» ամսագրում։ Այժմ առկա են չորս տասնյակից ավելի համատեղ աշխատանքներ, որոնք տպագրվել են բարձր ազդեցության գործակից ունեցող արտասահմանյան ամսագրերում։ Պրոֆեսոր Գերոնիկակին բազմիցս այցելել է Հայաստան համատեղ գիտահետազոտական աշխատանքների քննարկումների համար, որոնց շրջանակներում ձեռք են բերվել նոր պայմանավորվածություններ՝ հետագա գիտական համագործակցությունը զարգացնելու ուղղությամբ:

Աթինա Գերոնիկակին ծնվել է 1949 թվականի օգոստոսի 9-ին։ 1971 թվականին ավարտել է Տաշքենդի պետական համալսարանը (Ուզբեկստան): 2006-2016 թվականներին ղեկավարել է Սալոնիկիի Արիստոտելի համալսարանի դեղագործական քիմիայի լաբորատորիան։ 2010 թվականից նույն համալսարանի դեղագիտության ֆակուլտետի պրոֆեսոր է, իսկ 2009-2011 թվականներին՝ դեղագիտության ֆակուլտետի փոխնախագահ։ 2013 թվականին ընտրվել է Միջերկրածովյան գիտությունների և արվեստների ակադեմիայի լիիրավ անդամ, իսկ 2015 թվականին՝ Եվրոպական գիտությունների և արվեստների ակադեմիայի անդամ։ Ունի Էրազմուսի 23 համաձայնագիր, ինչպես նաև Պաուլ Էրլիխի դեղագործական քիմիայի դոկտորական ցանցի համալսարանական համակարգողն է։

Պրոֆեսոր Գերոնիկակին հեղինակել է ավելի քան 220 գիտական հոդված, որոնք հրապարակվել են գիտական ամսագրերում, ինչպես նաև 10 դասագիրք ուսանողների համար։ Կազմակերպել է բազմաթիվ միջազգային գիտաժողովներ, որոնց թվում կարելի է նշել «Computational Methods in Toxicology and Pharmacology» (2003, 2015, 2019), «3rd Eurasian Meeting in Heterocyclic Chemistry» (2006), «17th Hellenic symposium in Medicinal Chemistry» (2017), «MedChem» (2023) և այլն։ Իր գիտական գործունեության համար արժանացել է մի շարք միջազգային մրցանակների և դիպլոմների։