Այսօր, սեպտեմբերի 9-ին, Ազգային ժողովում հայտարարությունների ժամին, «Հայաստան» խմբակցության պատգամավոր Թադևոս Ավետիսյանը կարևորեց տարածաշրջանային տնտեսական ինտեգրումը։ Նրա խոսքով, տնտեսական գործընթացների զարգացումը պետք է հիմնված լինի բոլոր մասնակիցների ազգային շահերի փոխհամաձայնեցման վրա, ոչ թե մեկ երկրի լիարժեք վերահսկողությամբ։

Ավետիսյանը նշեց, որ մինչ 44-օրյա պատերազմը Թուրքիան և Ադրբեջանը փորձել են տնտեսական շրջափակմամբ առաջ մղել իրենց շահերը։ Սակայն ներկա ռազմական հաջողությունները և Հայաստանի բարդ իրավիճակը նրանց թույլ են տալիս օգտագործել «փափուկ ուժ»՝ սեփական շահերը առաջ տանելու համար՝ ապաշրջափակման անվան տակ։

Պատգամավորը ընդգծեց, որ այս գործելակերպը վտանգավոր ճանապարհ է, որը կարող է հանգեցնել Հայաստանի ինքնիշխանության կորստին և տնտեսական անհավասարակշռություններին, որտեղ գերիշխում են մյուսների շահերը։

Թուրքիա-Ադրբեջան համագործակցությունն ընդգրկում է նույնիսկ ռազմական ուժի սպառնալիքը, որը կարող է խոչընդոտել Հայաստանի տնտեսական զարգացմանը և ստեղծել կարևոր վտանգներ տնտեսական անվտանգության համար։

Բացի այդ, այս ամենը ներկայացվում է “խաղաղության խաչմերուկ” անվան տակ, առանց անհրաժեշտ հաշվարկների և գնահատումների՝ Հայաստանի կայուն զարգացման տեսանկյունից։

Ըստ Ավետիսյանի, Հայաստանի իշխանություններին պարտադրվում է մի ուղի, որը կարծեցյալ խաղաղության փոխարեն ներառում է թուրքական ազդեցության մեծամասնության տարածումը՝ որով էլ Ռուսաստանի, Իրանի և Չինաստանի ազդեցությունը տարածաշրջանից վերջնականապես դուրս է մղվում։

Ադրբեջանը և իր դաշնակիցներն իրականացնում են իրենց սցենարը՝ անընդհատ զիջումների տանելով Հայաստանի ինքնիշխանությունն ու պետականությունը։ Այս քաղաքականությունը նպաստում է Հայաստանի տնտեսական ենթարկվածության աճին։