Լեռնային Ղարաբաղի հակամարտության կարգավորման գործում միջազգային հանրությունը չի օգտագործել բոլոր անհրաժեշտ ջանքերը։ Այս տեսակետը հայտնել է Ռենե Ռուկեն՝ Ֆրանսիայի Ազգային ժողովի նախկին պատգամավորն ու Ֆրանսիա-Հայաստան բարեկամության խորհրդարանական խմբի նախկին նախագահը, Երևանում տեղի ունեցած «Արցախ. չլուծված հակամարտություն, վերադարձի իրավունք» միջազգային համաժողովում:

Ռուկեն նշել է, որ երեք տասնամյակ շարունակված պայքար է ընթացել Արցախի իրավունքների ճանաչման ուղղությամբ։ Նա հարց է բարձրացրել միջազգային ատյաններում՝ արդյոք հասկացել են տարածաշրջանի էթնիկ բարդությունները, ընդգծելով, որ Արցախը կարողացել է պետություն կառուցել՝ բոլոր անհրաժեշտ հատկանիշներով։ Նա պատմել է իր այցելությունների մասին Ստեփանակերտ, ինչպես նաև նախկին ղեկավարների՝ նախագահ Ռոբերտ Քոչարյանի և ԱԺ նախագահ Աշոտ Ղուլյանի հետ հանդիպումների մասին։

Ռուկենի խոսքով՝ խնդրի լուծման ուղիների մասին խոսելուց առաջ պետք է հասկանալ Արցախի պատմությունը և նրա ներկայիս վիճակի պատճառները։ Նա նաև մեկնաբանել է Ադրբեջանում տիրող հայատյացության և ազգային խտրականության մթնոլորտը։ Ռուկեն իր աջակցությունն է հայտնել Արցախից բռնի տեղահանվածներին, հակամարտության զոհերին և Բաքվում պահվող գերիներին։

ԵԱՀԿ Մինսկի խմբի լուծարման կապակցությամբ Ռուկեն ընդգծել է, որ այդ քայլը օրինականացնում է Ադրբեջանի հանցավոր գործողությունները։ Նա նաև նշել է, որ այն ճանապարհի բացումը, որն Ադրբեջանը պահանջում է Սյունիքով, մեծ ռիսկեր է պարունակում Հայաստանի համար։