ԱՄՆ նախագահ Դոնալդ Թրամփը և Իսրայելի վարչապետ Բենիամին Նեթանյահուն պատրաստվում են ուլտիմատում ներկայացնել ՀԱՄԱՍ շարժմանը, որն, եթե չընդունվի, կարող է հանգեցնել Իսրայելի կողմից Գազայի հատվածում ռազմական գործողությունների ընդլայնմանը, հաղորդել է The New York Times-ը։

Ըստ տեղեկությունների՝ Իսրայելը պահանջում է, որ ՀԱՄԱՍը անհապաղ ազատ արձակի առնվազն 20 իսրայելցի պատանդներին՝ Իսրայելի բանտերից պաղեստինցի բանտարկյալների ազատ արձակման դիմաց։ Ակնկալվում է նաև, որ ՀԱՄԱՍը պետք է վերադարձնի զոհված պատանդների 30 մարմինները։ Իսրայելն ու ԱՄՆ-ն պահանջում են, որ ՀԱՄԱՍը համաձայնի զենքը վայր դնել և դադարեցնել զինված պայքարը ապագայում։

ՀԱՄԱՍի խոսնակ Մահմուդ Մարդավին հաղորդել է, որ շարժումը չի համաձայնվի զենքը վայր դնելուն։ «Սա մեր պահանջն է եղել՝ պատերազմը դադարեցնել, գերիների ազատ արձակում Գազայում և հետագա հստակ ու համապարփակ համաձայնագրեր կնքել», — նշել է նա։

Հուլիսի 27-ին Գազայում ՀԱՄԱՍի առաջնորդ Խալիլ ալ-Հայան նշել է, որ Իսրայելի հետ բանակցությունները անիմաստ են շրջափակման պայմաններում։ Մինչ այդ, Նեթանյահուն հրամայել էր վերադարձնել պատվիրակությունը Կատարից, որտեղից հուլիսի 6-ից բանակցություններ էին անցկացվում Գազայի հակամարտության կարգավորման շուրջ։ ԱՄՆ նախագահի հատուկ բանագնաց Սթիվեն Ուիթքոֆն էլ հայտնել է, որ Վաշինգտոնն նույնպես հետ է կանչել իր ներկայացուցիչներին Դոհայից՝ նշելով, որ ՀԱՄԱՍի պատասխանը ցույց է տալիս հրադադարի ձեռքբերման չտրամադրվածություն։ Սակայն պաղեստինցի արմատականները չեն համաձայնել այս գնահատականի հետ՝ հայտարարելով, որ մյուս միջնորդները տրված պատասխանը կառուցողական են անվանել։