**Ողբերգական ավտովթար Սյունիքի մարզում. մեկ զոհ**

Այսօր՝ հուլիսի 12-ին, Սյունիքի մարզի Կապան քաղաքում մահացու ավտովթար է տեղի ունեցել։ Ժամը 11:00-ի սահմաններում Բաղաբերդի 1 հասցեի մոտ բախվել են երկու մեքենա՝ «ՎԱԶ 2121» և «ՎԱԶ 2106»։

«ՎԱԶ 2121»-ը վարել է 46-ամյա Արման Մ.-ը, իսկ «ՎԱԶ 2106»-ը՝ 59-ամյա Անդրանիկ Վ.-ը։ Վթարի հետևանքով «ՎԱԶ 2121»-ի վարորդին քաղաքացիների օգնությամբ հաջողվել է դուրս բերել մեքենայից ու տեղափոխել «Կապան» բժշկական կենտրոն։

Մինչդեռ «ՎԱԶ 2106»-ի վարորդին փրկարարները դուրս են բերել օպերատիվ միջամտությամբ։ Տեղում բուժօգնություն ցուցաբերելուց հետո նրան տեղափոխել են շտապօգնության մեքենայով, սակայն ճանապարհին նա մահացել է։

Փրկարարները հոսանքազրկել են երկու մեքենաները, փակել գազի փականները և սահմանազատել վթարի գոտին։

Վթարի վայրում ներկա են եղել նաև Սյունիքի մարզի ոստիկանության պարեկային ծառայության աշխատակիցներ՝ գումարտակի հրամանատար Գևորգ Զաքարյանի և ավագ տեսուչ Նարեկ Մանուչարյանի ղեկավարությամբ։

Քննչական կոմիտեի Սյունիքի մարզային վարչությունը նախաձեռնել է քրեական վարույթ։ Ավտոմեքենաները տեղափոխվել են ոստիկանության պահեստ՝ հետագա քննության համար։

Հիշեցնենք, որ ՀՀ օրենսդրությամբ մեղադրյալը համարվում է անմեղ, մինչև նրա մեղավորությունը վերջնականապես հաստատվի դատարանի կողմից։