ՄԱԿ-ի Մարդու իրավունքների գերագույն հանձնակատարի գրասենյակը (ՄԻԳՀԳ) հայտնել է, որ Գազայում օգնության մատակարարումների սկսվելուց հետո արձանագրվել է առնվազն 798 սպանություն։ Դրանք տեղի են ունեցել ինչպես ԱՄՆ-ի և Իսրայելի աջակցությամբ գործող օգնության կետերում, այնպես էլ ՄԱԿ-ի և այլ կազմակերպությունների հումանիտար շարասյուների մոտ։

ՄԱԿ-ի տվյալներով՝ զոհվածների մեծ մասը (615 մարդ) Գազայի հումանիտար օգնության հիմնադրամի (GHF) կողմից աջակցվող օգնության կետերում է զոհվել։ Եվս 183 մարդ, ըստ նախնական տեղեկությունների, սպանվել է հումանիտար շարասյուների երթուղիներում։

«Հուլիսի 7-ի դրությամբ մենք գրանցել ենք 798 մահվան դեպք, որից 615-ը՝ Գազայի հումանիտար օգնության հիմնադրամի օբյեկտների մոտ, և 183-ը՝ հումանիտար շարասյուների երթուղիներում», — Ժնևում տեղի ունեցած մամլո ասուլիսի ժամանակ հայտարարել է ՄԻԳՀԳ-ի ներկայացուցիչ Ռավինա Շամդասանին։

GHF հիմնադրամը օգտագործում է ամերիկյան մասնավոր անվտանգության և լոգիստիկ ընկերություններ՝ օգնություն Գազա հասցնելու համար՝ հիմնականում շրջանցելով ՄԱԿ-ի համակարգման մեխանիզմները։ Իսրայելը պնդում է, որ նախկին համակարգի միջոցով հումանիտար օգնության մի մասը զինյալների ձեռքն է ընկել։

Հիմնադրամը սննդի փաթեթների բաշխումը սկսել է մայիսի վերջին և մի քանի անգամ հերքել է իր կետերում զոհերով միջադեպերի մասին հաղորդումները։