Շվեյցարիայի Ազգային խորհրդի պատգամավոր Շտեֆան Մյուլլեր-Ալտերմատը կարծում է, որ Եվրամիության արտաքին և անվտանգության քաղաքականության հարցով բարձր ներկայացուցիչ Կայա Կալասի՝ Հայաստան կատարած այցը Բրյուսելի կողմից Երևանին ուղղված աջակցության արտահայտությունն է։

Շվեյցարացի պատգամավորը այս մտքին է արտահայտվել՝ խոսելով վերջին շրջանում Հայաստանի և Եվրոպական միության միջև զարգացող գործընկերության մասին։ Անդրադառնալով Կայա Կալասի՝ հունիսի 29-30-ը Երևան կատարած այցին՝ նա նշել է. «Կալասի այցը պետք է դիտարկել որպես Եվրամիության՝ Հայաստանին աջակցելու հանձնառության նշան։ Սա ԵՄ-ի հստակ ազդանշան է՝ Հայաստանին որպես Կովկասյան տարածաշրջանում իրավահավասար գործընկերոջ դիտարկելու մասին»։

Մյուլլեր-Ալտերմատը միաժամանակ ընդգծել է, որ չնայած Եվրամիության հետ հարաբերությունների զարգացմանը՝ Հայաստանի համար տնտեսական առումով կարևոր են մնալու Ռուսաստանի հետ կապերը։ «Միջնաժամկետ և երկարաժամկետ հեռանկարում Հայաստանին անհրաժեշտ են Ռուսաստանի հետ սերտ տնտեսական հարաբերությունները։ Այս իրավիճակը կհանգեցնի Հայաստան-ԵՄ հարաբերությունների վերաբերյալ լայն քննարկումների»,― ավելացրել է նա։

Հիշատակելով, որ հունիսի վերջին Երևան կատարած իր այցի ժամանակ ԵՄ-ի բարձր ներկայացուցիչ Կայա Կալասը և Հայաստանի իշխանությունները հայտարարել էին գործընկերության նոր օրակարգի շուրջ բանակցությունների ավարտի մասին՝ շվեյցարացի պատգամավորը նշել է, որ Եվրամիությունը սկսել է դիտարկել Հայաստանը որպես տարածաշրջանում կարևոր գործընկեր։