Հայ Յեղափոխական Դաշնակցության Հայ երիտասարդական միության անդամ Անդրանիկ Չամիչյանի գործով վերջնական որոշումը կհրապարակվի առավոտյան ժամը 11:30-ին։ Այս մասին լրագրողներին հայտնել է փաստաբան Ռուբեն Մելիքյանը։

«Ես դատավորին խնդրագրով դիմել եմ՝ Անդրանիկ Չամիչյանի հարցաքննության տեսագրությունը վերանայելու համար, քանի որ այն կարող է կարևոր դեր խաղալ ներքին համոզմունք ձևավորելու գործում։ Սակայն չգիտեմ՝ արդյոք դա այս դեպքում ամենահիմնական գործոնն է։ Բոլորդ էլ հասկանում եք, թե ինչ նկատի ունեմ։ Մեր վարկածն այն է, որ Անդրանիկի մոտ հայտնաբերված իրերը Strikeball սպորտային խաղի պարագաներ են։ Հատուկ ուզում եմ ընդգծել, որ իմ պաշտպանյալի տիրապետման տակ գտնված ոչ մի առարկա անօրինական չէ։ Նույնը հաստատել է նաև քննիչը, սակայն նա պնդում է, որ բոլոր իրերը միասին վկայում են որոշակի բանի մասին։ Երբ ես հարցրել եմ, թե կոնկրետ ինչ ահաբեկչական գործողություն էր նախապատրաստվում, պատասխան չեմ ստացել»,- նշել է Մելիքյանը։

Հայաստանի մայրաքաղաք Երևանի Աջափնյակ և Դավթաշեն վարչական շրջանների ընդհանուր իրավասության դատարանում քննվում է Հայ Յեղափոխական Դաշնակցության երիտասարդական կազմակերպության անդամ Անդրանիկ Չամիչյանի նկատմամբ կալանքի միջոցի կիրառման հարցը։