ԱՄՆ-ն կարող է հաջորդ շաբաթ Իրանի հետ վերսկսել միջուկային բանակցությունները։ Ըստ տեղեկությունների՝ հանդիպումը կայանալու է Նորվեգիայի մայրաքաղաք Օսլոյում։

Սպիտակ տան հատուկ ներկայացուցիչ Սթիվ Ուիթքոֆը հանդիպելու է Իրանի արտաքին գործերի նախարար Աբբաս Արաղչիի հետ՝ քննարկելու միջուկային համաձայնագրի հետ կապված հարցեր։ Քննարկման ճշգրիտ ամսաթիվը դեռ հայտարարված չէ, և երկու երկրներից էլ պաշտոնական հաստատում չի եղել։

Վերջին ամիսներին ԱՄՆ-ն ու Իրանը լարվածություն են ապրել՝ կապված միջուկային ծրագրի հետ։ Նախորդ ամիս ԱՄՆ նախագահ Դոնալդ Թրամփի հրամանով իրականացվել էր ռազմական հարված Իրանի միջուկային օբյեկտների դեմ։ Եթե Օսլոյում հանդիպումը տեղի ունենա, դա կլինի այդ իրադարձություններից հետո առաջին ուղիղ բանակցությունների փորձը։

Ավելի վաղ Իրանի արտգործնախարար Աբբաս Արաղչին հայտարարել էր, որ ամերիկյան հարվածները զգալի վնաս են պատճառել Ֆորդոյի միջուկային կենտրոնին։ Նրա խոսքով՝ երկրի Ատոմային էներգիայի կազմակերպությունն այս պահին գնահատում է վնասի մասշտաբները, և տեխնիկական վերլուծությունից հետո կիրականացնի զեկույց կառավարությանը։

Արաղչին նաև հստակեցրել է, որ փորձագետները կարող են վերականգնման աշխատանքների հնարավորության մասին խոսել միայն ամբողջական գնահատումից հետո։ Նա հիշեցրել է, որ Իրանի կրոնական ուսմունքն արգելում է միջուկային զենքի ստեղծումը։