ԱՄՆ-ի կոնգրեսում աշխատող 21-ամյա փորձնակ Էրիկ Թարպինիան-Ջահիմը երկուշաբթի երեկոյան Վաշինգտոնում կրակոցից մահացու վիրավորվել է։ Դեպքի մասին տեղեկություններ է հրապարակել NBC NEWS-ը։

Ոստիկանությունը պարզել է, որ Թարպինիան-Ջահիմը կրակողի նշանառության օբյեկտը չէր։ Իրավապահ մարմինների տվյալներով՝ մոտավորապես երեկոյան ժամը 22:28-ին 7-րդ և M փողոցների (NW) խաչմերուկում մի խումբ անձինք դուրս են եկել մեքենայից և կրակ բացել ամբոխի վրա։

Բացի Թարպինիան-Ջահիմից, կրակոցների հետևանքով վիրավորվել են նաև մեկ կին և 16-ամյա դեռահաս, սակայն նրանք կենդանի են մնացել։

Երբ շտապօգնության ծառայությունը ժամանել է դեպքի վայր, Էրիկն արդեն գիտակցությունը կորցրած վիճակում էր։ Նա երեքշաբթի օրը մահացել է հիվանդանոցում։

Կանզասից կոնգրեսական Ռոն Էսթեսը, որի մոտ Թարպինիան-Ջահիմը պրակտիկա էր անցնում, ցավակցություն է հայտնել զոհվածի ընտանիքին։ Էսթեսի գրասենյակը նշել է, որ Թարպինիան-Ջահիմը Մասաչուսեթսի Ամհերստի համալսարանի ավագ կուրսի ուսանող էր՝ ֆինանսների և քաղաքագիտության մասնագիտացմամբ։

«Ես երբեք չեմ մոռանա նրա բարությունը և այն, թե ինչպես էր նա միշտ ժպտադեմ ողջունում մեր գրասենյակ այցելող յուրաքանչյուրին»,— ասել է Էսթեսն իր ցավակցական խոսքում։

«Մենք շնորհակալ ենք Էրիկին Կանզասի 4-րդ շրջանին և մեր երկրին մատուցած ծառայության համար։ Խնդրում եմ միանալ իմ և Սյուզանին՝ աղոթելու նրա ընտանիքի համար և հարգելու նրանց անձնական կյանքը այս դժվար պահին»։

Զոհի մայրը՝ Թամարա Թարպինիան-Ջահիմը, հրաժարվել է մեկնաբանություններ տալուց։ Washington Post-ին նա ասել է. «Ասելու բան չկա»,— արտասվելով։

Ֆիլիպ Փիթերսենը Թարպինիան-Ջահիմի հետ ծանոթացել էր հունվարին՝ Ամերիկյան ուսումնասիրությունների ծրագրում պրակտիկա անցնելու ընթացքում։ Նրանք միասին մասնակցել են վիկտորինաների, քննարկել կյանքը, կանանց և իրենց նպատակները։ Փիթերսենը պատմում է, որ Թարպինիան-Ջահիմը երազում էր ֆինանսական ոլորտում կարիերա ստեղծել։ Նա հիշում է, թե ինչպես ապրիլին միասին այցելել են Սպիտակ տան այգի։ «Նա ինձնից շատ ավելի բարձրահասակ էր»,— ավելացրել է Փիթերսենը։

Ոստիկանությունը մինչև 25 հազար դոլար պարգև է հռչակել սպանության մեջ կասկածվող անձանց նույնականացման կամ նրանց հետապնդմանը նպաստող տեղեկությունների համար։ Այս գումարը Կոլումբիայի շրջանում սպանությունների գործերում ստանդարտ է։