Ուկրաինան չի կարողացել հավելյալ զինատեսակներ ստանալ ԱՄՆ-ից, և նույնիսկ ԱՄՆ նախկին նախագահի հաստատված մատակարարումները վերջերս սառեցվել են։ Այս պայմաններում Կիևը նոր ռազմավարություն է մշակում՝ ձգտելով ստանալ Վաշինգտոնի թույլտվությունը, որպեսզի եվրոպական երկրները ԱՄՆ-ից զենք ձեռք բերեն Ուկրաինայի համար։ Այդ մասին տեղեկացված աղբյուրներ են հայտնել Politico-ին։

Նոր ծրագրի համաձայն՝ մի քանի եվրոպական կառավարություններ քննարկում են օգտագործել իրենց պաշտպանական բյուջեները Ուկրաինայի համար ամերիկյան զենք գնելու և փոխանցելու հարցը։ Աղբյուրները նշում են, որ այդ ծախսերը կարող են հաշվառվել որպես ՆԱՏՕ-ի պաշտպանական նախաձեռնություններին աջակցող ներդրումներ։

Այս մոտեցումը պետք է հաստատի ԱՄՆ կառավարությունը, և մանրամասները ներկայումս քննարկման փուլում են։ Պարզ չէ՝ Վաշինգտոնը կհաստատի՞ առաջարկը։ Հայտնի է նաև, որ Ուկրաինան ժամանակի ճնշման տակ է՝ կապված Ռուսաստանի կողմից Սումիի մարզում ռազմական գործողությունների մասշտաբավորման հետ, որտեղ ռուսական զորքերը վերահսկողություն են հաստատել ռազմավարական կարևորություն ունեցող հանքավայրերի նկատմամբ։

Միաժամանակ ԱՄՆ Կոնգրեսի հանրապետական անդամ Բրայան Ֆիցպատրիկը պահանջել է, որ Սպիտակ տունը և Պաշտպանության նախարարությունը արտակարգ զեկույց ներկայացնեն Պենտագոնի կողմից Ուկրաինային զենքի մատակարարումները դադարեցնելու մասին։

Ֆիցպատրիկը հարցրել է, արդյոք ԱՄՆ-ն կշարունակի ապահովել Ուկրաինային անհրաժեշտ ռազմական օգնությունը՝ «իր ժողովրդին պաշտպանելու և ազատության համար պայքարելու համար»։